Hneăng hôp mâu kăn Đảng ƀô̆ Chin phuh roh má môi, hneăng 2025-2030 kô po tung 2 hâi sap hâi lơ 12-13/10/2025. Veăng hôp ai 453 ngế kăn teăng mâ ăm lối 209 rơpâu ngế đảng viên dêi 2 rơpâu 211 tôh tơrŭm cheăng Đảng tung tâi tâng Đảng ƀô̆ Chin phuh. Hneăng hôp mâu kăn Đảng ƀô̆ Chin phuh rôh má môi, hneăng 2025-2030 cho Hneăng hôp ki apoăng dêi Đảng ƀô̆ Chin phuh tiô túa tơkŭm po hôp ki nếo.

Ƀă troăng hơlâ “Tơrŭm rak tro luât - môi tuăn pơ’lêh nếo- Mơnhông tơƀrê tung pêi cheăng -  Achê ƀă kuăn pơlê”, Hneăng hôp kô pơtối mơgêi mâu tơdroăng, tối mâu tơdroăng hiăng pêi hiăng châ pêi pro dêi hneăng hơnăm 2020 - 2025, tăng ngăn dêi tơdroăng cheăng pơkuâ ki hâi tro vâ rơnêu, hnê mơhno dêi Khu kăn Đảng ƀô̆ Chin phuh hneăng hơnăm 2020-2025; ‘nâi nhên troăng vâ prôk, tơdroăng cheăng vâ pêi, troăng hơlâ pêi cheăng tung hneăng 2025-2030; klêi mê, tơpui tơno, veăng hnê tối a hlá mơ-éa chêh mâu Tơdroăng  kal dêi Tíu xiâm pơtroh ăm Hneăng hôp mâu kăn tung lâp tơnêi têa rôh má 14 dêi Đảng.