a kơxo hâi lơ 19/1, a Tíu xiâm po Rôh hôp Tơnêi têa (Hà Nội), Hneăng hôp khu kăn lâp tơnêi têa rôh má XIV dêi Đảng Kŏng san Việt Nam po rôh hôp hbrâ. Hdrối vâ po rôh hôp hbrâ, mâu kăn ki veăng hôp a rôh hôp hiăng mot ngăn poăng ‘măn Pôa Hồ Chí Minh, ‘măn rơvĭng reăng ƀă têk nhang a Um meăn tơbâ mâu ngế khên tơnôu.

Tâi tâng Hneăng hôp mơdoh chôu tu ko tơbâ troh pôa Nguyễn Phú Trọng, Kăn xiâm pơkuâ hnê ngăn cheăng Đảng hneăng hdrối ƀă mâu kăn cheăng tung xiâm Đảng hneăng XIII ki hiăng hlâ. Pôa Trần Thanh Mẫn, ngế cheăng tung khu xiâm kal kí, kăn xiâm hnê ngăn Kuô̆k hô̆i teăng mâ mâu kăn pơkuâ dêi Đảng, tơnêi têa pơkuâ po rôh hôp hbrâ. Hneăng hôp hiăng têk kŏng môi tuăn khât tơbleăng tơdroăng hôp hbrâ, Túa pơkâ pêi cheăng dêi Hneăng hôp, Tơdroăng pêi cheăng dêi Hneăng hôp ƀă Túa pơkâ pôk kăn a Hneăng hôp khu kăn lâp tơnêi têa rôh má XIV dêi Đảng.

Hneăng hôp hiăng pôk Khu kăn xiâm hnê ngăn ai 16 ngế cheăng tung khu xiâm kal kí; pôk Khu ki chêh tôm xo rơkong ai 5 ngế ƀă Khu séa ngăn cho mâu kăn ki veăng hôp a Hneăng hôp ai 13 ngế. Hneăng hôp hiăng têk kŏng môi tuăn tiô túa cho ngế kăn, ƀă tâi tâng 1.586 ngế châ krếo thế veăng hôp a Hneăng hôp.