VOV4.Xơ Đăng - Kơxo lơ 9/3, a Hà Nội po rôh hôp má môi Hneăng hôp mâu kăn cho vâi kơdrâi lâp tơnêi têa rôh má 13, hneăng hơnăm 2022 – 2027. Veăng hôp a rôh hôp ai 1 rơpâu ngế mâu kăn cho vâi kơdrâi ki rơkê, kơhnâ, teăng mâ ăm mâu khu vâi kơdrâi, mâu hdroâng kuăn ngo, mâu ngế ki tiô khôp ƀă mâu kơvâ pêi cheăng ki phá tơ-ê dei rơpó tung lâp tơnêi têa.

Hneăng hôp po sap ing hâi lơ 9/3 troh hâi lơ 11/3. Pơxá “Mơdêk khôi hmâ  tơrŭm, rơkê, xua tơdroăng kro mơdrŏng dêi tơnêi têa”, Hneăng hôp mơnhên tối tơdroăng tơ’noăng vâi kơdrâi ƀă tơdroăng cheăng dêi Khu ngăn vâi kơdrâi Việt Nam tung pơla hdrối kố nah, pơkâ mơ’no túa pêi cheăng, mâu tơdroăng ki kal tung hneăng hơnăm 2022 -2027 ƀă pôk xo Kăn pơkuâ ngăn vâi kơdrâi Việt Nam hneăng 13.

A rôh hôp má môi, mâu kăn môi tuăn rah mâu kăn hnê ngăn, khu ki chêh tôm xo rơkong Hneăng hôp, ing tơdroăng Hneăng hôp ƀă túa pơkâ Hneăng hôp. Hdrối mê, mâu kăn hiăng mot tung tíu ‘măn poăng pôa Hồ Chí Minh, ‘măn reăng a um meăn mâu ngoh khên tơnôu ki hiăng hlâ Bắc Sơn.

Katarina Nga tơplôu ƀă tơbleăng