Mâu tơdroăng ki châ séa ngăn, pơkâ a hneăng hôp kố cho vâ gum ăm rôh kăch măng xing xoăng ‘mot tơkŭm tíu pêi cheăng kơ koan tơnêi têa, pêi pro châ tơdroăng púi vâ khât dêi tơnêi têa tung chal ki nếo. Kố cho tơdroăng ki dế châ xo môi tuăn khât dêi kăn ƀô̆, đảng viên ƀă kuăn pơlê, xuân môi tiah pro ivá ‘na tơdroăng cheăng tơkŭm, kăn ƀô̆ a Hneăng hôp rôh má 14 dêi Đảng; pôk kăn Kuô̆k hô̆i hneăng 16 ƀă Hô̆i đong hnê ngăn kuăn pơlê rêm râ pơla hơnăm 2026 – 2031.

Pakĭng mê, Kuô̆k hô̆i kô séa ngăn, pơkâ, rĕng tŏng gum xơpá, tơvâ ‘na troăng hơlâ tŏng gum, pro ivá mơnhông vâ pêi pro klêi tơdroăng pơkâ, mơnhông kơxô̆ liăn ngân, pro chiâng tơdroăng ki mơnhông nếo, vâ pêi pro ƀlêi chiâng mâu tơdroăng pơkâ Hneăng hôp rôh má 13 dêi Đảng hiăng mơ’no.

Xuân a Hneăng hôp kố, Kuô̆k hô̆i kô séa ngăn, tơbleăng 4 tơdroăng tơkêa luât: Luât Tơrŭm Chin phuh (‘mâi pơhlêh); Luât Tơkŭm khu kăn pơkuâ kong pơlê (‘mâi pơhlêh); Luât ‘mâi pơhlêh, ‘mot tơ’nôm mâu tơdroăng dêi Luât Tơrŭm Kuô̆k hô̆i; Luât Pơkâ hlá mơ-éa luât (‘mâi pơhlêh). Hneăng hôp kố tiô tối hdrối pêi cheăng tung pơla 6 hâi tơdế, sap ing hâi lơ 12 troh hâi lơ 19/2/2025.