VOV4.Xơ Đăng - Kơxo lơ 14/1, a Hà Nội, Khu pơkuâ mơngế hơnăm hiăng krâ Việt Nam tơkŭm po Hneăng hôp roh má 6, hneăng hơnăm 2021 – 2026. Mâu hơnăm hiăng hluâ, tơdroăng ‘’Mâu ngế hiăng krâ - Djâ troăng ahdrối’’ hiăng mơhnhôk rơtuh ngế hơnăm hiăng krâ veăng; hiăng ai 650 rơpâu ngế hơnăm hiăng krâ veăng tơdroăng rêh ối pơlê pơla, môi tiah: Kăn pơkuâ hnê ngăn Chi ƀô̆, Kăn pơkuâ tôh kơphô̆, Kăn pơkuâ khu ki tơleăng, tơdroăng cheăng Măt trâ̆n ƀă mâu khu cheăng pơlê pơla veăng kum mơjiâng khu cheăng kal kí a tíu pêi cheăng ó rơdêi.

Xông tơpui a Hneăng hôp, pôa Trần Thanh Mẫn, Kăn xiâm phŏ hnê ngăn Kuô̆k hô̆i tối nhên tơdroăng plĕng trâu hơngế hiâm mơno, troăng tơmiât Pôa Hồ Chí Minh đi đo pơchân tối rêm ngế pin. Mê cho: rêm ngế kăn ƀô̆, đảng viên, kŏng chưk, viên chưk thế nhuô̆m mâu ngế krâ. Pơkâ thế Khu pơkuâ mơngế hơnăm hiăng krâ pơtối pơ’lêh nếo troăng pêi cheăng, tơkŭm kơdrâm hên tâ mâu ngế veăng tung tơdroăng tơ’noăng ‘’Hơnăm hiăng krâ – Djâ troăng ahdrối’’.

Katarina Nga tơplôu ƀă tơbleăng