VOV4.Xơ Đăng - Việt Nam pói vâ kô tối tơbleăng troăng tơmiât pêi la ngiâ ƀă túa ki rơkê tơtro lâp plâi tơnêi tung pro tơniăn cheăng kâ – rêh ối pơlê pơla krúa lĕm ƀă kong prâi, krá tơniăn ƀă tâi tâng, thăm pêi pro châ tơƀrê Tơdroăng rak  tơniăn ƀă mơnhông mơdêk cheăng kâ – rêh ối pơlê pơla klêi kơ’nâi tâi pơreăng COVID-19. Kố cho mơnhên dêi pôa Phạm Bình Minh, Ngế pro xiâm phŏ hnê mơhno má môi a Hneăng hôp lâp plâi tơnêi ‘’Thăm rak tơniăn cheăng kâ krúa lĕm ƀă kong prâi ƀă tâi tâng: Tơdroăng hriâm ing túa ki rơkê tơtro lâp plâi tơnêi’’ xua tơdroăng mơnhông mơdêk Khu lâp kong têa UNDP ƀă Khu xiâm tơpui kâ tơrŭm tơkŭm po, pơxiâm po kơxo hâi lơ 25/2 a Hà Nội tiô troăng tơdrêng ƀă mơ’no tơdrêng tung um tiô troăng măng Internet.

 Xông tơpui pơxiâm po hneăng hôp, pôa Phạm Bình Minh mơnhên: ing xo vế túa ki rơkê tơtro pơ’lêh nếo, lôu péa ƀă mot tơrŭm tung lối 35 hơnăm hiăng hluâ, rêm troăng pơ’lêh, pro pơ’lêh dêi Việt Nam pơrá ing tơdroăng pơ’lêh nếo troăng tơmiât, hlê plĕng, tơmiât troh mâu tơdroăng ki pơxúa mơnhông mơdêk ton xŏn, tâi tâng dêi tơnêi têa, dêi kuăn pơlê.

Ƀă hneăng hôp hâi kố cho roh vâ Việt Nam tơmâng mâu rơkong tơpui tối ing mâu ngế ki rơkê, mâu khu tơrŭm lâp plâi tơnêi, mâu ngế hriăn plĕng tung tơnêi têa ƀă kong têa ê, ‘na troăng tơmiât pêi la ngiâ ƀă túa pêi ki rơkê tơtro lâp plâi tơnêi tung rak tơniăn cheăng kâ – rêh ối pơlê pơla krúa lĕm kong prâi, krá tơniăn ƀă tâi tâng.

A Sa Ly tơplôu ƀă tơbleăng