VOV4.Xơ Đăng - Kơxê lơ 4/4, hneăng hôp tiah hmâ khế 3 dêi Chin phuh pơtối ƀă tơdroăng cheăng mơjiâng luât. Chin phuh hiăng tơmâng, tơpui tơno pơkâ thế mơjiâng luât rak ngăn, xúa liăn tơnêi têa ‘no pêi pro tê mơdró a khu mơdró ‘mâi hơ’lêh; pơkâ thế mơjiâng luât mơnhông mơdêk cheăng ƀă kơmăi kơmok; tơdroăng tơkêa luât khăm, pơlât, tơbleăng ‘na tơdroăng pơkâ tơnêi tíu xúa tiô kơ tơrêm hơnăm ƀă mâu kơpong hngêi kơmăi ki ai tơnêi lối 500 ha tung hlá mơ-éa Pơkâ ‘na rak ngăn kơpong hngêi kơmăi ƀă kơpong cheăng kâ. 

Tơpui ‘na tơdroăng mơjiâng luât, mâu ngế tung Chin phuh hiăng mơnhên tơ’nôm tơdroăng ki kal thế ai mâu tơdroăng tơkêa bro, pơkâ mơjiâng Luât mê; mâu tíu ki hâ ho pá puât, tơvâ tơvân kal tơleăng mơnhên; riân ki tơtro, ăm tơ-brê tâ, pro tơdâng pơla mâu luât... ing troăng rơhlâ pơkâ dêi luât ôh tá xê to rak ngăn mê ối pro xiâm ki tro luât vâ kum mơnhông mơdêk. Mơgêi tơdroăng mơjiâng luât, Ngế pro xiâm hnê ngăn Chin phuh môi tuăn ‘na mâu tơdroăng tơkêa luât ƀă tơpui dêi mâu ngế cheăng tung chin phuh. Ngế pro xiâm hnê ngăn tơnêi têa pơcháu ăm khu xiâm, kơ koan tơdjâk troh pơkuâ, tơrŭm tơmâng xo, pê klêi vâ pơtroh ăm Kuô̆k hô̆i séa ngăn.

Gương tơplôu ƀă tơbleăng