Kăn xiâm pơkuâ hnê ngăn Đảng, Kăn xiâm hnê ngăn Tơnêi têa tối ăm ‘nâi, rôh séa ngăn, mơnhên ngăn rôh kố prôk trâu hơngế tung tơdroăng cheăng kăn ƀô̆ ƀă tơdroăng pêi pro tơdroăng pơkâ, troăng hơlâ dêi Tơnêi têa, Khu xâm pơkuâ kal kí sap apoăng hơnăm 2025 troh nôkố. Riân tơdroăng châ tơƀrê Séa ngăn tơdroăng pêi cheăng hiăng mơhno nhên tơdroăng mơ-eăm dêi khu kăn ƀă mâu kăn ƀô̆.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tơnêi têa mot tung hneăng mơnhông nếo, pơkâ thế pê klêi luât pơkâ rĕng tâ, tơdâng tơ'mô tâ, tơtro tâ.

Kuô̆k hô̆i athế rế rak tơniăn pơkâ, séa ngăn kơtăng hnoăng pơkuâ, rế mơjiâng tíu hơ'lêh nếo tơmiât pêi rơkê, tơbêng ivá pêi cheăng ƀă mơhnhôk tâi tâng ivá. Ing tơdroăng châ hlo, séa ngăn, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Khu pơkuâ Đảng ủy Kuô̆k hô̆i tơkŭm pơkuâ, hnê mơhno 6 hnoăng cheăng, troăng pêi ki kal. Kăn ƀô̆ tí tăng 'nâi plĕng mơjiâng luât, pơkâ troăng hơlâ athế achê hên tâ ƀă tơdroăng pơkuâ kong pơlê, pêi cheăng, tê mơdró ƀă tơdroăng rêh ối kuăn pơlê.