Veăng ƀă xông tơpui a Hneăng hôp, jâ Võ Thị Ánh Xuân, Phŏ Kăn xiâm hnê ngăn tơnêi têa mơnhên ƀă kheăn kơdeăn mâu tơdroăng châ tơƀrê dêi mơngế pêi cheăng kơvâ Kơmăi kơmok kơchâ – tơmeăm khoăng tung kơdâm tơnêi Việt Nam. Pakĭng mâu tơdroăng châ tơƀrê, TKV xuân kal tơdrăng hvái ngăn xuân ối ai mâu tơdroăng ki kơdroh, môi iah: tơdroăng ki tá hâi tơdâng tung pêi pro tơdroăng a mâu tíu pêi cheăng, lơ tơdroăng xúa kŏng ngê̆ thong tin ối hrá.

Jâ Võ Thị Ánh Xuân, Phŏ Kăn xiâm hnê ngăn tơnêi têa pơkâ thế TKV tung hneăng hơnăm 2025 – 2030 pơtối mơnhông khôi túa kơnía ‘’Tơdroăng pơkâ thế rak ƀă Môi hiâm mơno’’, pêi pro ƀlêi trâng mâu pơkâ Tơdroăng pơkâ Hneăng hôp Đảng ƀô̆ Grup pơkuâ roh má IV hiăng pơkâ mơ’no. Tơkŭm a mâu tơdroăng tơ’noăng ƀă pơhlêh xúa kŏng ngê̆, tiô rơxông nếo mơjiâng pro tơmeăm khoăng, tơniăn pêi cheăng ƀă mơdêk tơdroăng rêh ối mơngế pêi cheăng.

Ki rơhêng vâ tối, kal tơtrŏng mơnhông mơdêk, hnê tơ’nôm mâu ngế ki nếo, kheăn kơdeăn teăm tơdrêng, tơdrăng, kơjo mơngế pêi cheăng tơdrêng, mơ-eăm tâk 5 – 10% kơxô̆ khu pú hên, ngế krê châ kheăn kơdeăn tâng pơchông ƀă hneăng hdrối.