VOV4.Xơ Đăng - A Hngêi Kuô̆k hô̆i , Vi ƀan ngăn ‘na mơhno túa le\m tro hnê hrâm dêi Kuô̆k hô̆i tơrŭm ƀă Khu xiâm ngăn mố đô̆i tro rong ƀă rêh ối pơlê pơla  ƀă Vi ƀan tơnêi têa ‘na mâu droh rơtăm Việt Nam tơkŭm po Hneăng hôp tơpui ’na tơdroăng pơkâ tơnêi têa ƀă mâu droh rơtăm hơnăm ối nêó 2022 ƀă pơxá ‘’Hnê cheăng pêi ăm mâu droh rơtăm hơnăm ối nếo’’.

A hneăng hôp, mâu kăn tơpui tơno mâu tơdroăng kal, mê cho: Mâu troăng rơhlâ, luât pơkâ dêi Đảng, Tơnêi têa ‘na hnê cheăng pêi ăm mâu droh rơtăm; tơdroăng hnê cheăng pêi ăm mâu droh rơtăm thôn pơlê, droh rơtăm kŏng nhân, droh rơtăm ki plôm mâ, chó chêng, tơvê kŏng, droh rơtăm kuăn ngo, mố đô̆i hiăng tâi hơnăm pro lêng, hok tro, sinh viên; mâu luât pơkâ tŏng kum, pâ thế ‘na hnê cheăng pêi ăm mâu droh rơtăm tung pơla ai pơreăng COVID-19 ƀă tơdroăng ‘mâi hơ’lêh cheăng ƀă kơmăi kok roh má pŭn, rơtế ƀă mâu tơdroăng ki ê tơdjâk troh.

Hneăng hôp xuân cho rôh vâ mâu droh rơtăm tối tơdroăng púi vâ dêi tơná, tối  hlối pâ thế mâu kơ koan tơnêi têa ‘na tơdroăng hnê cheăng pêi ăm mâu droh rơtăm. Ing mê, kum mâu kơ koan khu râ pơkuâ cheăng ‘nâi ƀă tơleăng mơnhên mâu tơdroăng tơdjâk troh, veăng mơdêk ki hlê plĕng dêi mâu droh rơtăm ƀă tung lâp pơlê pơla ‘na luât tŏng kum hnê cheăng pêi.

Gương tơplôu ƀă tơbleăng