VOV4.Xơ Đăng - Hâi lơ 14/2, a Hà Nội, Khu xiâm pơkuâ ‘na pêi chiâk deăng ƀă mơnhông mơdêk thôn pơlê tơrŭm ƀă Vi ƀan tơnêi têa mơngế Việt Nam a kong têa ê tơkŭm po hneăng hôp tơpui tơno tơdjêp ngế tê mơdró tơnêi têa pin rêh ối pêi cheăng a kong têa ê, thăm mơdêk tê mơdró ƀă mơ’no liăn cheăng kơvâ pêi chiâk deăng. Ƀă pơkâ xiâm pơtối thăm tơbleăng, tơdjêp mơ’no liăn cheăng ƀă tê mơdró tơmeăm pêi lo ing chiâk deăng, thăm mot tơrŭm lâp plâi tơnêi kơvâ pêi chiâk deăng,

Hneăng hôp kô tơbleăng ƀă kuăn pơlê pin rêh ối pêi cheăng a kong têa ê ‘na pơkâ troăng prôk la ngiâ kơjo mơhnhôk mơ’no liăn cheăng ƀă tơrŭm cheăng kâ tê mơdró tung kơvâ pêi chiâk deăng, loăng, ká xi xŏng xuân môi tiah tơmeăm ki vâ mơnhông tơmeăm OCOP. Hneăng hôp xuân cho roh tơpui tơno, tơmâng xo mâu rơkong tơpui hnê tối, mâu ngế ki rơkê rêh ối pêi cheăng a kong têa ê vâ thăm mơnhông tê tơmeăm khoăng ngi kong têa ê, pro tơ’lêi hlâu vâ kuăn pơlê pin rêh ối pêi cheăng a kong têa ê veăng mơ’no liăn cheăng, tê mơdró, tơrŭm ƀă khu tê mơdró, kuăn pơlê pêi chiâk deăng ƀă tơrŭm cheăng tung tơnêi têa, ing mê mơjiâng tơdroăng tơdjêp ƀă kuăn pơlê pin rêh ối pêi cheăng a kong têa ê tung tê tơmeăm ƀă mơ’no liăn mơjiâng pro mâu tơmeăm pêi lo ing chiâk deăng.

A Sa Ly tơplôu ƀă tơbleăng