VOV4.Xơ Đăng - Kơxo lơ 11/1, Khu pơkuâ xiâm cheăng Đảng tơkŭm po hneăng hôp tung lâp tơnêi têa mơgêi tơdroăng séa ngăn hơnăm 2021, tơbleăng tơdroăng cheăng pêi hơnăm 2022. Tơbleăng a hneăng hôp, pôa Võ Văn Thưởng, Ngế pơkuâ cheăng Đảng tối nhên, vâ mơdêk troăng rơhlâ pêi cheăng tơná, ki loi nhoăm, ivá cheăng pơkuâ tơnêi têa, Đảng pin thế pơtối mơdêk ƀă tơbleăng tơdroăng mơjiâng ‘mâi rơnêu Đảng tâk a kơlo ki kân tâ, rơtế ƀă tơdroăng mơjiâng cheăng kal kí; hbrâ mơdât, kâ kơluâ rơtế ƀă tơdroăng mơdât pro ôh tá tro; mơdât, troh tah rơtế ƀă mơ-eăm pơxâu kơtăng mâu ngế ki pro ôh tá tro, “ ki tí tăng pro hmâng vâ”; “ ki tăng pơ’lêh xêh”.

Hneăng hôp tơpui tơno

Pôa Võ Văn Thưởng pơkâ thế, rêm râ Đảng, khu tơrŭm cheăng Đảng, Vi ƀan séa ngăn rêm râ thế tơkŭm tí tăng ‘nâi plĕng, hriâm tâp, tơbleăng pêi tơ-ƀrê mâu pơkâ, thế mơhno, tối mơgêi, pơkâ dêi Đảng ‘na tơdroăng séa ngăn, tí tăng ngăn, mơ’no tah mơngế tung Đảng cheăng ôh tá tro. Mơjiâng tơdroăng pơkâ séa ngăn, tí tăng ngăn ƀă pêi pro, tơtro ƀă tơdroăng hlo ai dêi cheăm, tơring, kong pơlê, tíu pêi cheăng.

Gương tơplôu ƀă tơbleăng