Hâi lơ 21/2, a Pơlê kong kân Hồ Chí Minh hiăng po Hneăng trâm mâ pơla Khu xiâm ngăn Cheăng kal kí Đảng Kŏng san Việt Nam ƀă Khu xiâm pơkuâ hnê ngăn Đảng Kuăn pơlê Kul, dó inâi CPP, xua pôa Tô Lâm-Kăn xiâm pơkuâ hnê ngăn Đảng Kŏng san Việt Nam prế pôa Hun Sen, Kăn xiâm hnê ngăn Đảng Kuăn pơlê Kul, Kăn xiâm hnê ngăn Kuô̆k hô̆i kong têa Kul pơkuâ po.

Kố cho roh trâm mâ, tơpui tơno ki kal vâ thăm mơnhông hên tâ kơ mê nếo tung tơrŭm cheăng pơla péa pâ tơnêi têa ki lĕm tro, nhŏng o tiô khôi túa roh nah, tơrŭm tung rêm kơvâ cheăng, krá tơniăn ton la ngiâ pơla péa Đảng, péa Tơnêi têa ƀă kuăn pơlê péa pâ Tơnêi têa Việt Nam ƀă Kul tung pêi pro mâu hnoăng cheăng chal nếo. A roh trâm mâ mê, pôa Tô Lâm prế pôa Hun Sen hiăng tối pơtâng ăm dêi pó ‘na tơdroăng cheăng pêi pro dêi tơrêm hnoăng Đảng, rêm túa rêh ối-pêi cheăng dêi tơnêi têa tơná; tơpui ‘na  tơdroăng lâp plâi tơnêi, tung kơpong ƀă mâu tơdroăng xiâm ki péa tơnêi têa vâ ‘nâi plĕng; vêh mơnhên ki hiăng tơluâ păng ‘nâng tung tơrŭm cheăng pơla péa pâ pơla hdrối mê hía nah ƀă môi tuăn mâu troăng  pơkâ tơrŭm tung la ngiâ.

Péa Ngế kăn xiâm hiăng môi tuăn pơtối rak vế, mơnhông hnoăng cheăng ki hiăng châ tơƀrê tung kĭ tơkêa tơrŭm cheăng pơla péa Đảng, péa tơnêi têa, thăm mơdêk tơrŭm tung kơvâ cheăng kring vế tơnêi têa, gak ngăn tơdroăng rêh ối, thăm mơdêk tơrŭm tung pêi cheăng kâ, tê mơdró, túa lĕm tro, hnê hriâm, ôm hyô tơxâng ƀă tơdroăng, tơmeăm ki hiăng ai hlâu dêi rêm to tơnêi têa ƀă tơrŭm cheăng pơla péa Đảng, péa tơnêi têa, tơdrêng amê, thăm mơdêk tơrŭm cheăng châ tơƀrê, ki păng ‘nâng pơla mâu kơ koan dêi Đảng, Kuô̆k hô̆i, mâu khu xiâm, kơvâ cheăng dêi Chin phuh, Măt trâ̆n, mâu khu pơkuâ ngăn kuăn pơlê ƀă mâu kong pơlê, pơlê kong kân dêi péa tơnêi têa tung hneăng ki mơnhông chal nếo, gum pro ai pơxúa ki khât păng ‘nâng ăm dêi kuăn pơlê a péa tơnêi têa.

A roh trâm mâ, pôa Phạm Minh Chính, Ngế pro xiâm hnê ngăn Chin phuh prế pôa Hun Manet, Ngế pro xiâm hnê ngăn kong têa Kul vâ môi tuăn mâu tơdroăng ki kal athế rĕng pơkâ pêi pro tung la ngiâ, ki malối pơkâ pêi pro mâu tơdroăng ki tơrŭm tung pêi cheăng, pêi lo liăn ngân pơla Việt Nam ƀă Kul, ƀă tơrŭm cheăng kâ pơla pái kong têa Việt Nam-Kul-Lếo.