Pơxiâm rôh hôp tơpui tơno, Hneăng hôp hiăng tơmâng Đăi tươ̆ng Phan Văn Giang, Ngế cheăng tung khu xiâm kal kí, Ngế xiâm ngăn lêng, pơchuât mơ-éa ai inâi “Mơjiâng Khu lêng kuăn pơlê kăch măng, chính quy, ƀĕng ƀeăn, rơkê, pro xiâm mơjiâng cheăng lêng krá rơdêi, rơkê plĕng, tro ƀă gâk kring kuăn pơlê ƀă tơdroăng tro hiâm mơno kuăn pơlê krá rơdêi”, ƀă Đăi tươ̆ng Lương Tam Quang, Ngế cheăng tung Khu xiâm kal kí, Ngế xiâm ngăn Kŏng an, pơchuât ‘na tơpui ai inâi “Cheăng kŏng an pêi pro 3 pơkâ pêi xiâm tung la ngiâ dêi Đảng: Hơniâp lĕm, tơniăn – mơjiâng khu ki rơkê – hơniâp ro dêi kuăn pơlê”.

Pơtối mê, tung pơchuât a Hô̆i trương, jâ Phạm Thị Thanh Trà, Phŏ Ngế pro xiâm hnê ngăn tơnêi têa, Đảng ƀô̆ Chin phuh tối nhên hiâm mơno Chin phuh tơmiât pêi, mơjiâng, tơdrăng ƀă pêi pro kơtăng gum kuăn pơlê.

Hên rơkong tơpui tối nhên tơdroăng ki pơtối mơnhông tơƀrê mơjiâng, pro klêi troăng hơlâ, tơleăng mâu kơxô̆ liăn ăm mơnhông, mơjiâng pro troăng klông tung la ngiâ tơdâng tơ’mô, rơkê, pêi pro tơnêi tơníu mơjiâng pro nếo; mơdêk rơdêi klâ xoăng râ, xoăng hnoăng tro ƀă xoăng liăn ngân ƀă thăm lăm ngăn, séa ngăn ƀă túa pơkâ “kong pơlê pơkâ, kong pơlê pêi, kong pơlê chiu pôu râng” tiô túa ki khât ƀă tơƀrê má môi.