Hngêi trung Phôh thong ai tíu kâ koi ối pơtê Râ má môi ƀă Râ má péa Buôn Đôn hlo hơniâp ro hbrâ rơnáu ăm hơnăm hriâm apoăng a hngêi trung nếo. Mâu kơbong lâm hriâm, kơpong tíu kâ koi ối pơtê, hngêi kâ, hngêi pơtâp ivá, plông kơtú ƀa long mini ƀă hên ki ê hiăng hbrâ rơnáu vâ tơdah hok tro. Ƀă o H’Sinh Nhị Kbuôr, hok tro lâm 8, tơdroăng ro kân má môi cho sap ing nôkố châ ối a môi hngêi trung ai tíu kâ ối pơtê a cheăm.

Hdrối nah, ga rơhêng vâ mot hriâm tung Hngêi trung Phôh thong Hdrông kuăn ngo ai tíu kâ koi ối pơtê kong pơlê Dak Lak a bêng Buôn Ma Thuột, la troăng prôk lối 60km ƀă rơpŏng hngêi hlối xơpá mê tơdroăng ki rơhêng vâ mê ôh tá chiâng khât. Nôkố, hngêi trung nếo hiăng pro tơ’lêi hlâu ăm tơdroăng hriâm tâp mê troh achê hngêi tâ ƀă o H Sinh Nhị.

“Hơnăm hriâm nếo kố, á mot hriâm a hngêi trung ki ai tíu kâ koi ối pơtê péa râ ai tíu ối lĕm krúa, ai tŭm kế tơmeăm xúa môi tiah kơmăi mơ’no hyôh hngíu, koat. Á rêh ối akố hmiân tuăn khât. Pakĭng mê, mâu kơbong lâm xuân ai tŭm kế tơmeăm ki vâ hriâm, luâ tâ hên tâng vâ pơchông ƀă hngêi trung ki ton hdrối nah. Á kô mơ-eăm hriâm tâp kơhnâ, vâ tơdroăng tơchĕng tơmiât chiâng châ khât cho pro Kŏng an Kuăn pơlê”.

Ƀă Buôn Si Sa Núc Lào, kuăn ngo Lếo, a buôn Trí, cheăm Buôn Đôn, hơnăm kố hriâm lâm 6, Hngêi trung Phôh thong ai tíu kâ koi ối pơtê Râ má môi ƀă râ má péa Buôn Đôn, hngêi trung nếo xuân po môi tíu hriâm tâp tơ’lêi hlâu tâ, hlối pro tơ’lêi hlâu vâ á hriâm pơtâp ivá, hriâm tơdroăng ki ga hâk vâ.

“Hngêi trung nếo á mot hriâm ai Hngêi tơ’noăng ivá, ai plông kơtú ƀa long mê hriâm pơtâp ivá gá hâk vâ khât. Ngin o ôh tá êa hriâm a plông tơnêi a gong tôu môi tiah hdrối nah. Rêm rôh kơxê, á lăm kơtú ƀa long ƀă khu pú ki ôh tá xâu kơtong châi môi tiah a plông kơtú ƀa long tơnêi achê hngêi. Á kô mơ-eăm hriâm ăm i rơkê. Á hêng vâ chiâng ngế ki kơtú ƀâ long ƀă kô mơ-eăm pêi pro chiâng tơdroăng ki rơhêng vâ kố”.

Mâu tơdroăng ki pơhlêh mê ai pơxúa khât a Buôn Đôn, môi tung 4 to cheăm tơkăng kong tơnêi ‘lâng dêi kong pơlê Dak Lak. Cheăm ai vâ chê 6.700 pơ’leăng mâ mơngế, kơxô̆ ngế kuăn pơlê hdrông kuăn ngo châ lối 75%. Hơnăm hriâm 2026-2027, Hngêi trung Phôh thong hdrông kuăn ngo a tíu kâ koi ối pơtê Râ má môi ƀă Râ má péa Buôn Đôn ai 1.138 ngế hok tro sap ing lâm 1 troh lâm 9. Tâi tâng hok tro hriâm a hngêi trung ƀă kâ pơxúa ing troăng hơlâ tŏng gum tiô pơkâ môi tiah hlá mơ-éa hriâm, kâ koi, ối pơtê, hmân ếo, pơkhom mi tơkel, xoăng koi.

Hngêi trung tơbleăng tơdroăng hnê hriâm phôh thong tơmiât troh mơnhông túa hiâm mơno, ivá hok tro tung hriâm tâp. Ƀă hok tro hdrông kuăn ngo a môi to cheăm ki ối trâm hên xơpá, pơkâ pêi kố ôh tá xê to mơdêk điêm hriâm mê ối gum mâu vâi o ai tơ’nôm tơdroăng rêh ối, tơdroăng ki loi tơngah ƀă tơdroăng ki hmâ ƀă tíu hriâm tâp nếo.

Tiô jâ Phạm Thị Loan, Phŏ pơkuâ hngêi trung, xua hơnăm apoăng pêi cheăng, hngêi trung hbrâ rơnáu krâu sap ing kơƀăng tăng troh mơjiâng túa hnê hriâm ƀă pơkuâ ngăn hok tro ăm tơtro ƀă túa pơkâ hngêi trung péa râ.

“Tơniăn tơdroăng hnê ƀă mơhriâm châ tơƀrê khât, hngêi trung hiăng hbrâ rơnáu tơdâng tơ’mô mâu tơdroăng pơla rêm râ hriâm vâ tơdjêp tơniăn krá pơla hriâm tâp ƀă hriâm pât dêi mâu vâi o hok tro. ‘Na cheăng tơkŭm ối pơtê a hngêi trung la nôu pâ vâi chĕm mơ’rêh dêi, hngêi trung hiăng tơbleăng sap ing apoăng hơnăm hriâm vâ mâu thái cô, ngế pêi cheăng ‘nâi nhên túa pơkâ, hbrâ rơnáu hiâm mơno pơkuâ ngăn hok tro ki kâ koi ối pơtê la nôu pâ vâi chê̆m mơ’rêh dêi ƀă hok tro ki kâ koi ối pơtê xua tơnêi têa tŏng gum”.

Hngêi trung, kơƀăng tăng nếo, tơdroăng hnê ƀă mơhriâm xuân nếo pâ thế tơdroăng ki nếo há ƀă mâu thái cô. Vâ chê 60 ngế thái cô dêi hngêi trung hiăng hriâm a mâu lâm hriâm dêi tơdroăng hnê hriâm phôh thong hơnăm 2018, tơdrêng amê hlối hmâ ƀă túa ki xúa mâu tơdroăng kế tơmeăm hnê ki rơkê plĕng tiô chal nôkố châ ‘no liăn roê ăm mâu lâm hriâm. Ƀă cô Phan Thúy Hằng, cô hnê nâl Ănglê, màn hình cảm ứng ƀă mâu kế tơmeăm xúa ôh tá xê pro ăm lâm hriâm ai tŭm mâu kế tơmeăm tâ mê ối po tơ’nôm túa ki tơkŭm tung ƀai hnê.

“Hnê nâl Ănglê tung lâm hriâm ki ai tŭm tơmeăm ai màn hình cảm ứng ƀă ai kơmăi pê hyôh hngíu, kố cho tơdroăng ki tơ’lêi hlâu vâ ư̆ng yŭng kŏng ngê̆, tơkŭm po mâu tơdroăng ki hmâng – tơpui, tơno xah hêi ƀă tơpui tơnó hơniâp ro tâ, pro ăm hok tro hâk vâ, ƀă kơhnâ tâ tung hriâm tâp. Á xuân hlê tiah kố, kố cho rôh ki tơ’lêi hlâu, cho hnoăng cheăng pôu râng vâ tơná á pơhlêh nếo túa ki hnê, tơbleăng pêi tơƀrê mâu kế tơmeăm xúa vâ mơdêk ki rơkê tung hnê môn nâl Ănglê tối krê, mâu môn hriâm ki ê tối tơdjuôm”.

Ƀă tơdroăng tơmâng ngăn dêi Đảng, Tơnêi têa, sap ing hơnăm hriâm nếo, lối 1.100 ngế hok tro cheăm tơkăng kong Buôn Đôn (kong pơlê Dak Lak) châ hriâm tâp, kâ koi ối pơtê ƀă rêh ối tung hngêi trung ki lĕm, ai tŭm tơmeăm. Ôh tá xê mơdêk thăm tơdroăng ki mơhriâm tâp, hngêi trung hriâm mê ối cho “toăng hngêi ối tơdjuôm”, tíu ki păn roăng tơdroăng tơchĕng tơmiât, hriâm pât ƀă mơhriâm tâp dêi hok tro kơpong tơkăng kong khên tơnôu xông kân, la ngiâ ôh tâ hngế ‘na veăng gum mơjiâng pơlê cheăm, rak vế Tơnêi têa.