Tung pơla kố nah, Hô̆i đong Hdrông kuăn ngo dêi Kuô̆k hô̆i ƀă 3 kơ koan kĭ Pơkâ tơrŭm hiăng tiô tơdroăng cheăng, hnoăng cheăng dêi rêm kơ koan ƀă tơdroăng xiâm pơkâ vâ pêi pro mâu tơdroăng pêi cheăng, mơnhên tơdroăng xiâm, pôu râng hnoăng cheăng ƀă troăng pêi tơrŭm tơtro, gum mâu kơ koan hbrâ tung tơpui tơdroăng, veăng mơjiâng luât, séa ngăn, mơnhên ngăn ƀă pơkâ thế troăng hơlâ.

Tơdroăng pêi cheăng tơrŭm kố hiăng djâ ăm mâu tơdroăng châ tơƀrê păng ‘nâng, tŏng gum tơdroăng rêh ối ƀă kế tơmeăm, ihiâm mơno dêi kuăn pơlê hdrông kuăn ngo. Xông tơpui hnê mơhno a Hôp tơno tơdroăng kal, pôa Trần Thanh Mẫn, Kăn xiâm hnê ngăn Kuô̆k hô̆i tối, tơdroăng tơrŭm vâ pơtối thăm pêi pro tơdroăng mơjiâng luât, mơnhên ngăn, séa ngăn ƀă pơkuâ tơnêi têa; tơ’nôm tiô kêi đeăng troăng hơlâ, tah lôi pá puât tung tơkŭm pêi pro mâu kơpong kuăn pơlê hdrông kuăn ngo, kong ngo, tơkăng kong; tah lôi mâu tơdroăng pá puât tung tơdroăng tơrŭm sap ing hdrối nah troh nôkố; pêi pro châ tơƀrê tâ tung tơdroăng pơtroh tơdroăng nếo ai ƀă séa ngăn pêi pro; tơxâng pơkâ, hnoăng cheăng dêi rêm kơ koan, tíu pêi cheăng tung hneăng nếo.