VOV4.Xơ Đăng - Kơxo lơ 7/3, a Pơlê kong kân Đà Nẵng, po Rôh hôp mơgêi hnoăng cheăng Hô̆i đong Hnê ngăn kuăn pơlê mâu kong pơlê, pơlê kong kân kơpong peăng tơdế Tơnêi têa, Tây Nguyên hơnăm 2021 ƀă tối tơbleăng túa pơkâ hnoăng cheăng hơnăm 2022. Hơnăm 2021, mâu kong pơlê hiăng mơ-eăm tơkâ luâ xơpá, tơkŭm po tơƀrê khât hnoăng cheăng tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hneăng hơnăm 2021 – 2026.

Pôa Trần Thanh Mẫn, kăn xiâm phŏ hnê ngăn má môi Kuô̆k hô̆i tối tiah kố, Hô̆i đong hnê ngăn kuăn pơlê mâu kong pơlê, pơlê kong kân hiăng pêi pro tro tơdroăng cheăng séa ngăn, hơ’lêh nếo, mơdêk ki rơkê plĕng ƀă tiâ mơnhên, tơkŭm po hên tơdroăng cheăng séa ngăn tơdroăng kal. Laga, pôa Trần Thanh Mẫn ối tô tuăn ‘na tơdroăng ki roê xúa kế tơmeăm tơdjuôm, hên kong pơlê pêi pro, la xuân ai kong pơlê pêi pro ôh tá tro pơkâ mê chiâng tơdjâk troh tơdroăng ki ai xôi.

Hô̆i đong hnê ngăn cho kơ koan séa ngăn la tá hâi teăm hlo mâu tơdroăng ki pro xôi kố. ‘Na túa pơkâ, hnoăng cheăng ƀă troăng hơlâ hnoăng cheăng hơnăm 2022, pôa Trần Thanh Mẫn pơkâ thế Hô̆i đong hnê ngăn mâu kong pơlê, pơlê kong kân pơtối séa ngăn, mơjiâng klêi ƀă tơkŭm pêi pro tơdroăng pơkâ pơtối hơ’lêh nếo, mơdêk ki rơkê plĕng hneăng hôp, rơkê tơdroăng cheăng, hnoăng cheăng trâm mâ kuăn pơlê, tơdroăng cheăng séa ngăn kơ-êng, tiâ mơnhên.

Katarina Nga tơplôu ƀă tơbleăng