A hneăng hôp, Hô̆i đong hnê ngăn kong pơlê Dak Lak tơkŭm tơpui tơno, têk kŏng mâu pơkâ ‘na klâ xoăng, ‘mâi rơnêu túa pơkâ kơxô̆ liăn ‘no pêi cheăng mơjiâng pro tơmeăm klêi kơ’nâi pêi pro mâu Tơdroăng pơkâ tơnêi têa; pơkâ pơcháu ƀiên chê̆ kong chưk, kơxô̆ ngế pêi cheăng tung tíu pêi cheăng kong lâp hơnăm 2025; pơhlêh tơnêi kong vâ pro mâu tơdroăng tơkêa ki kal; pơkâ túa pêi cheăng dêi Hô̆i đong hnê ngăn kong pơlê, Khu pơkuâ ngăn Hô̆i đong hnê ngăn, mâu Khu tơkŭm po, tôh kăn pơkuâ ƀă kăn Hô̆i đong hnê ngăn kong pơlê.

Xuân a rôh hôp, Hô̆i đong hnê ngăn kong pơlê Dak Lak hneăng X, hơnăm 2021-2026 hiăng pôk kăn phŏ hnê ngăn Hô̆i đong hnê ngăn kong pơlê. Ƀă kơxô̆ phĭu pôk châ lối 86,2% vâ, Hô̆i đong hnê ngăn kong pơlê Dak Lak hiăng pơkâ tơdroăng ki tối pôa Từ Thái Giang châ pôk pro phŏ kăn hnê ngăn Hô̆i đong kong pơlê Dak Lak hneăng X, hơnăm 2021-2026.

Tơpui a hneăng hôp, jâ Cao Thị Hòa An, phŏ kăn pơkuâ ngăn Đảng kong pơlê, Kăn hnê ngăn Hô̆i đong kong pơlê tối nhên: klêi kơ’nâi lối péa khế tơbleăng klâ xoăng, ‘mot tơkŭm péa to kong pơlê, kơ koan cheăng kăn pơkuâ kong pơlê péa râ rế hía rế hlo cheăng tơniăn, veăng gum ăm kăn achê ƀă kuăn pơlê tâ chêh pro mâu mơéa rĕng klêi tâ.