Tối nhên, kố cho rôh hôp apoăng, vâ mơhno tŭm tơdroăng, plâ tung pơlâ tơkŭm po tâ phĭu, tung la ngiâ, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế, tŭm tơdroăng cheăng dêi Hô̆i đong xuân thế pêi tiô troăng tơniăn mâu luât pơkâ môi tuăn kuăn pơlê, rak tro luât, tơbleăng tơdrăng, pêi tơdrăng ƀă rak tro luât tung tơdroăng tâ phĭu rah xo; hbrâ tŭm mơngế pêi cheăng, tơmeăm khoăng, liăn ƀă luât tơrŭm pêi ai pơxúa pơla mâu kơ koan ki tơdjâk troh.

Kăn xiâm hnê ngăn Kuô̆k hô̆i tối tiah kố, tơdroăng tâ phĭu tung lâp tơnêi têa, tơdroăng cheăng pêi hên, hâi chôu pêi iâ, xua mê thế hbrâ nhên tŭm tơdroăng. Pôa Trần Thanh Mẫn vâ môi tuăn ƀă tơdroăng veăng hnê tối dêi mâu ngế tung Hô̆i đông tâ phĭu rah dêi tơnêi têa kal mơdêk xúa kŏng ngê̆ thông tin tung tâi tâng mâu tơdroăng cheăng tâ phĭu; malối cho ứng dụng VNeID; tơmâng pơ’lêh kơxô̆ vâ hlê plĕng ing xiâm tơnêi têa troh 34 to kong pơlê, pơlê kong kân ƀă 3321 tíu pêi cheăng râ cheăm.