VOV4.Xơ Đăng - Kơxo lơ 29/3, a kong pơlê Quảng Ninh, Hô̆i đong tơpui leăng Tơnêi têa tơkŭm po Hneăng hôp má 3. Hneăng hôp tơkŭm tơpui tơno, veăng tơpui tung 2 Tơdroăng tơbleăng hnê mơhno, mê cho Tơbleăng hnê mơhno ‘’Mâu tơdroăng tơpui leăng – tơdroăng nôkố ing 15 hơnăm pêi pro Pơkâ Tơnêi têa 7 hneăng X ‘na pêi chiâk deăng, kuăn pơlê pêi chiâk deăng, thôn pơlê’’, Tơbleăng hnê mơhno ‘’Mâu tơdroăng tơpui leăng – tơdroăng ai khât hluâ 20 hơnăm pêi pro Pơkâ Tơnêi têa 5 hneăng má IX ‘na pơtối pơ’lêh nếo, mơnhông mơdêk ƀă mơdêk châ tơƀrê cheăng kâ khu pú hên’’.

Tâi tâng a hneăng hôp

Xông tơpui a hneăng hôp, pôa Nguyễn Xuân Thắng, Kăn xiâm hnê ngăn Hô̆i đông tơpui leăng Tơnêi têa tối rơdêi: Mâu tơdroăng hiăng châ tơƀrê kal khât ƀă ai kơnâ. Klêi kơ’nâi 35 hơnăm pơ’lêh nếo, pêi chiâk deăng ai troăng pơ’lêh rơdêi mơjiâng tơmeăm khoăng, xúa kơmăi kơmok rơxông nếo, mơdêk ki dâi lĕm ƀă châ tơƀrê, pơtối cho tíu ki kum ăm tơdroăng cheăng kâ; cheăng kâ thôn pơlê pơtối mơnhông mơdêk; tơdroăng mơjiâng thôn pơlê nếo châ tơƀrê kal khât.

A Sa Ly tơplôu ƀă tơbleăng