VOV4.Xơ Đăng - Klêi kơ’nâi rôh pơtê Têt Nhâm Dần 2022, hâi lơ 7/2, pơlê kong kơdrâm Ƀuôn Ma Thuột, kong pơlê Dak Lak hiăng ăm hok tro troh hngêi trung hriâm tơdrêng. Tung tơdroăng ki pơreăng xuân ối pơtối tâ tú ôh tá tơniăn, tơdroăng ki rak vế hnê hriâm tơdrêng ƀă hnoăng cheăng rak vế tơniăn châ mâu hngêi trung pơkâ cho tơdroăng ki xiâm. Pakĭng pêi pro kơtăng mâu tơdroăng pơkâ rak tơniăn hbrâ mơdât pơreăng, mâu hngêi trung hriâm xuân pơkâ hnoăng cheăng hriâm tung tơdroăng hmâ ki nếo.

Thái cô ƀă hok tro a pơlê kong kơdrâm Ƀuôn Ma Thuột troh hngêi trung hriâm tơdrêng klêi kơ’nâi hâi khế hriâm ing troăng hyôh internet

A Hngêi trung râ má péa Lạc Long Quân, pơlê kong kơdrâm Ƀuôn Ma Thuột, ai 680 ngế hok tro khô̆i lâm 7, 8, 9 hiăng troh hngêi trung. Séa ngăn tung tơdroăng ki hbrâ mơdât pơreăng COVID-19 dêi pơlê kong kơdrâm, mê pơlê kong kơdrâm Ƀuôn Ma Thuột pơkâ ăm hok tro sap ing khô̆i 7 – 9 hriâm tơdrêng klêi kơ’nâi Têt Lo hơnăm nếo. Klêi 1 hneăng hriâm tơdrêng ing troăng hyôh internet vâ hbrâ mơdât pơreăng COVID-19, hâi lơ 7/2, hok tro, thái cô a pơlê kong kơdrâm Ƀuôn Ma Thuột, kong pơlê Dak Lak pơxiâm mot tung rôh hriâm hneăng má 2 hriâm tơdrêng ƀă tơdroăng ki nếo. Tâi tâng pơrá hơniâp ro, hmâ tung tơdroăng nếo la athế tơmâng troh tơdroăng hbrâ mơdât pơreăng COVID-19.

Katarina Nga tơplôu ƀă tơbleăng