VOV4.Xơ Đăng - Kơ’nâi 1 măng tĭng hnê hriâm a hngêi trung, vâi ‘nĕng mầm non, hok tro râ má môi ƀă hok tro mâm 6 a pơlê kong kơdrâm Ƀuôn Ma Thuột, kong pơlê Dak Lak thế vêh hriâm tung Internet nếo tung hâi lơ 21/2/2022 ta troh drêng tối tơbleăng nếo. Xua châ Vi ƀan pơlê kong kơdrâm Ƀuôn Ma Thuột, kong pơlê Dak Lak pơkâ pơtê hriâm a hngêi trung ƀă mâu râ Mầm non, râ má môi ƀă hok tro lâm 6 xua pơreăng COVID-19 dế tâ tú rơ-iô a pơlê kong kơdrâm kố.

Hok tro râ mầm non vêh hriâm mơ'no tơdrêng tung um tiô troăng măng internet klêi kơ'nâi môi măng tĭng hriâm tơdrêng a hngêi trung

Troh nôkố hiăng ai lối 40 ngế thái cô ƀă lối 420 ngế hok tro yương tĭnh ƀă SARS- CoV 2.  Ƀă vâi ‘nĕng pa xôp 11 hơnăm ki hâi châ pâk vaccine hbrâ mơdât COVID-19. Vâ tơniăn ăm ivá hok tro ƀă thái cô, Vi ƀan pơlê kong kơdrâm Ƀuôn Ma Thuột, kong pơlê Dak Lak hnê mơhno pơtê ‘nôi hriâm a hngêi trung ƀă râ mâm non, râ má môi lâm 6 tung pơlê kong kơdrâm sap hâi lơ 21/2/2022 ta troh drêng tối tơbleăng nếo ah. Pơcháu ăm Ƀơrô ngăn hnê hriâm ƀă hnê mơjiâng tuăn ngôa rơkê tơbleăng troăng rơhlâ hriâm tung măng Internet ƀă râ hriâm mê.

Gương tơplôu ƀă tơbleăng