Kơxê hâi lơ 11/5, a Tíu xiâm po Hôp dêi Tơnêi têa a Mỹ Đình, Hà Nội po hneăng hôp ki ăm Hneăng hôp mâu kăn lung lâp tơnêi têa Măt trâ̆n tơnêi têa Việt Nam rôh má 11 hneăng hơnăm 2026-2031. Ƀă pơxá “Tơrŭm - Môi tuăn - Hơ’lêh nếo - Hriê̆n plĕng ki nếo - Mơnhông tơbrê”, Hneăng hôp po sap hâi lơ 11 troh lơ 13/5, cho tơdroăng hôp kal kí - pơlê pơla ki kal, po troăng ăm hneăng ki nếo dêi Măt trâ̆n Tơnêi têa Việt Nam tung pơla ai tơkŭm cheăng kal kí - Pơlê pơla ƀă mâu khu kuăn pơlê xua Đảng, Tơnêi têa pơcháu cheăng hiăng cho dêi tung Măt trâ̆n Tơnêi têa Việt Nam.  

Veăng hôp mê ai lối 1.300 ngế kăn teăng mâ, tung mê ai 1.138 ngế kăn mê cho Ngế cheăng tung Vi ƀan Tíu xiâm Măt trâ̆n tơnêi têa Việt Nam hneăng 10 ki dế pêi hnoăng cheăng; mâu kăn xua Hneăng hôp Măt trâ̆n tơnêi têa mâu kong pơlê, pơlê kong kân ƀă mâu khu tơrŭm tung khu rah xo; mâu kăn tối; mơngế Việt Nam a kong têa ê ƀă kăn ƀô̆ Măt trâ̆n ki pêi hnoăng cheăng. Tơbleăng tơdroăng kal pơtroh ăm hneăng hôp ai pơxá: “Mơdêk hnoăng pêi pro ki xiâm kal kí dêi Măt trâ̆n tơnêi têa Việt Nam tung pơtối rak vế ki môi tuăn, tơdroăng hmâ dêi ing nah pâ nhoăm tơnêi têa, ivá rơdêi môi tuăn tâi tâng hdroâng mơngế, mơnhông tơnêi têa kro mơdrŏng, rơkê plĕng, hơniâp ro”.

A rôh hôp ki hbrâ peăng kơxêi kố, hneăng hôp tơpui tơdroăng rah mâu Kăn hnê ngăn dêi Khu chêh tôm xo rơkong; ing tơdroăng tơbleăng, luât pơkâ pêi cheăng; tơbleăng mâu tơdroăng veăng hôp; Tí tăng ngăn mâu tơdroăng cheăng dêi Vi ƀan Tíu xiâm, Khu kăn hnê ngăn ƀă khu kăn Vi ƀan Tíu xiâm Măt trâ̆n tơnêi têa Việt Nam pơla hơnăm 2024-2026; tăng ngăn Hlá mơ-éa pơ troh ‘mâi hơ’lêh, tơ’nôm Tơdroăng dêi Luât Măt trâ̆n Tơnêi têa Việt Nam.