Tối tơbleăng dêi khu hnê mơhno tơnêi têa ‘na hbrâ ví khía mơhot têa kân lân lu tơnêi tơhnah tơhnâp ăm ‘nâi, sap ing apoăng hơnăm 2023 troh nôkố, kong mê khía mơhot ó khât a mâu kơpong, pro tơ’nhiê hên mâu kế tơmeăm, tơdjâk troh tơdroăng ki pêi chiâk deăng, tơkŭm hên a mâu túa kong kế kong mê kân, têa lân lu, tơnêi tơhnah tơhnâp, tơhnah mâu kĭng têa kroăng, mâu ‘noăng têa kơxĭ.

Tơpui mơgêi rôh pêi cheăng, pôa Lê Minh Khái, Ngế pro xiâm phŏ hnê ngăn tơnêi têa tối nhên, Chin phuh, Ngế pro xiâm hnê ngăn Chin phuh kô tơmâng ngăn khât, rơtế ƀă kong pơlê ‘mâi mơnhông mâu kế tơmeăm klêi kong mê khía mơhot vâ rak tơniăn tơdroăng rêh ối kuăn pơlê.

Tối nhên tơdroăng ki ‘mâi mơnhông klêi kơ’nâi kong mê khía mơhot pâ thế “Khŏm rĕng”, pôa Lê Minh Khái pơkâ thế, mâu khu xiâm kơvâ cheăng tơpui tơno, ăm rơkong veăng tơpui tối vâ môi tuăn pơtroh ăm Ngế pro xiâm hnê ngăn Chin phuh séa ngăn pơkâ, tŏng kum, tơƀrê, tro tơdroăng, tro pơkâ dêi luât pơkâ.