Tơpui a rôh leh, pôa Trần Cẩm Tú, Ngế cheăng tung khu xiâm kal kí, kăn pơkuâ hnê ngăn Đảng tơmâng xo ƀă mơnhên tối hiâm mơno, hnoăng cheăng pôu râng dêi mâu khu ki chêh hlá tơbeăng mâu kơ koan thŏng tâ̆n hlá tơbeăng tung tơnêi ƀă a kong têa ê tung cheăng tơbleăng tơdroăng kal, tơbleăng ‘na Hneăng hôp XIV dêi Đảng. Tơdrêng amê, hlối ăm ‘nâi, Hneăng hôp XIV kô po a Hà Nội sap ing hâi lơ 19 troh lơ 25/1/2026, ƀă tơdroăng ki veăng ai mâ dêi 1.586 ngế kăn, ngế ki teăng mâ ăm lối 5,6 rơtuh ngế đảng viên Đảng Kŏng san Việt Nam, ƀă túa pơkâ “Tơrŭm – Tơniăn – Kơhnâ – Tơƀrê – Mơnhông”.

Môi tơdroăng ki xiâm tung cheăng hbrâ rơnáu Hneăng hôp XIV cho pơhlêh nếo rơdêi tung chêh pro mơ-éa. Rôh apoăng, pái to mơ-éa pơchuât tơbleăng ki kal (Mơéa tơbleăng ‘na cheăng kal kí, Mơ-éa pơchuât ‘na cheăng kâ-pơlê pơla ƀă Mơ-éa tơbleăng mơjiâng Đảng) châ tơkŭm chiâng môi Mơ-éa tơbleăng ‘na kal kí môi tuăn, tơdâng.

Ôh ti xê pơtê to a tơdroăng mơnhên túa tơmiât, pơkâ pêi, Mơ-éa Hneăng hôp XIV ối ai tơdroăng pêi pro nhên, mơnhên tro tơdroăng pơkâ, tơdroăng pro ƀă hnoăng cheăng pôu râng pêi pro. Tơdroăng kố, ăm hlo ivá khŏm mơ-eăm ăm Pơkâ châ mot tung rêh ối klêi kơ’nâi Hneăng hôp, ‘mâi mơnhông tơdroăng ki hrá tung tơkŭm po tơbleăng.

Tơdroăng ki xo rơkong veăng tơpui tối dêi kuăn pơlê ƀă kơxop mơ-éa, ƀă vâ chê 14 rơtuh ngế veăng tơpui, cho mơhno ki rơkê ăm tơdroăng tơrŭm pơla túa tơmiât dêi Đảng ƀă hiâm mơno kuăn pơlê, tơdrêng amê, hlối mơhno kơlo ki môi tuăn dêi kuăn pơlê gá hên ƀă mâu tơdroăng pơkâ pêi ki kân ki Hneăng hôp XIV mơ’no. Rơtế amê, cheăng tơkŭm po, tŏng gum pá rŏng, gâk kring, tơniăn ƀă tơbleăng tơdroăng kal rĕng châ tơbleăng, rơkê, veăng gum ‘mâi mơnhông tơdroăng loi dêi kăn ƀô̆, đảng viên ƀă kuăn pơlê ƀă Hneăng hôp, pro chiâng tơdroăng môi tuăn khât tung Đảng ƀă tơdroăng môi tuăn tung pơlê pơla.