A rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i khĕn kơdeăn, hơnăm nah péa pâ hiăng rơtế ƀă dêi rơpó ‘mâi hơ’lêh, pơkâ pêi hên tơdroăng tơkêa bro luât ki kal; hbrâ vâ tâ phĭu rah xo kăn Kuô̆k hô̆i ƀă Hô̆i đong kuăn pơlê rêm râ.

Kăn xiâm hnê ngăn Kuô̆k hô̆i pơkâ thế, tung la ngiâ, péa kơ koan kal pơtối mơdêk tơrŭm tung mơjiâng luât ƀă séa ngăn, pơtối rak vế pêi pro hnoăng cheăng Hô̆i đong hnê tối, mâu ngế rơkê, khu cheăng khoa hok tung tơdroăng tơpui tối ‘na luât tŏng gum; hlối mơdêk tơƀrê tung rôh trâm mâ kuăn pơlê dêi mâu kăn Kuô̆k hô̆i ƀă Kăn Hô̆i đong kuăn pơlê rêm râ, rak tơniăn mâu tơdroăng tơhrâ, rơkong tơhrâ a ngiâ kuăn pơlê châ pêi pro tro.

Tối nhên, pơkâ pêi hơnăm 2026 thế pêi rĕng vâ châ tâk péa kơxô̆, tiô Kăn xiâm hnê ngăn Kuô̆k hô̆i, péa pâ tơrŭm vâ pơkâ mâu luât pơkuâ cheăng kâ - pơlê pơla xông tơƀrê, ‘na lêng kring vế tơniăn, mơjiâng khu cheăng kal kí krúa rơdêi, mơdêk tơpui kâ, tơdroăng hbrâ mơdât kâ kơluâ, pro ôh tá tro, mơhrê liăn hmâng vâ.