Tối tơbleăng a rôh hôp, pôa Trần Thanh Mẫn - Kăn xiâm hnê ngăn Kuô̆k hô̆i ăm ‘nâi, Khu tơrŭm po Hôp tơpui tơno hiăng xo ai 49 ƀai chêh ƀă hiăng tơkŭm, chêh, in tơbleăng chiâng kỷ yếu. Mâu tơdroăng hnê tối hên, tối trâu mâu troăng prôk tung 80 hơnăm hâi mơjiâng, mơnhông dêi Kuô̆k hô̆i Việt Nam.

Hên ngế tối, tham luận tơbleăng a rôh Hôp tối nhên tơdroăng pơtối xúa ki hriăn plĕng mâu ƀai hriâm tơdroăng rơnêu pât mâu tơdroăng ki hâi tro tung 80 hơnăm hdrối vâ mơdêk ki tơƀrê, ai pơxúa tung mâu hneăng la ngiâ, ki hdrối thế veăng ‘no hnoăng ăm hneăng hôp Đảng ƀô̆ rêm râ ƀă hneăng hôp mâu kăn tung lâp tơnêi têa rôh má 14 dêi Đảng; hbrâ hneăng tâ phĭu rah xo kăn Kuô̆k hô̆i hneăng 16, tâ phĭu rah xo kăn Hô̆i đong kuăn pơlê rêm râ hneăng hơnăm 2026-2031; tơkŭm pêi mâu tơdroăng cheăng ai pơxúa khât troh tơbâ 80 hơnăm - Hâi tâ phiu rah xo ki apoăng Kuô̆k hô̆i Việt Nam.