A thôn Sômalơng A, cheăm Ia Hiao, troăng tơnêi trâp hliâk, hâ ho hdrối nah nôkố hiăng châ po rơdâ, ok ƀê tong, prôk lăm hiăng hlâu tâ. Apoăng vâ mot a troăng cho hngêi dêi pôa Siu Hiếu, Kăn hnê ngăn Vi ƀan Măt trâ̆n Tơnêi têa Việt Nam cheăm Ia Hiao. Peăng tơnêi a ngiâ hngêi dêi rơpŏng pôa cho a troăng ki vâ po rơdâ. Hên ngế tô tuăn khât drêng thế pleăng dêi tơnêi ki kơnâ mê dêi rơpŏng hngêi, la pôa khŏm pleăng dêi tơnêi mê. Pôa Siu Hiếu tối tiah kố, vâ mơhnhôk kuăn pơlê mê kăn ƀô̆ thế pêi hdrối.

“A djâ troăng ahdrối tung tơdroăng hnê mơhnhôk kuăn pơlê pleăng tơnêi, kế tơmeăm, vâ xo tơnêi pro rơdâ troăng prôk. Ƀă rơpŏng hngêi ngin klêi hnê tối kuăn pơlê mâu ngế tung rơpŏng hngêi hiăng vâ môi tuăn pleăng môi iâ tơnêi vâ po rơdâ troăng prôk. Pơtối rak vế pêi pro hnoăng cheăng dêi mơngế đảng viên ki djâ troăng ahdrối tung hnê mơhnhôk’’.

Ing tơdroăng pêi pro troăng lĕm ahdrối dêi kăn ƀô̆, đảng viên, kuăn pơlê Ia Hiao chôa ‘lâng vâ môi tuăn ƀă troăng hơlâ po rơdâ pro troăng prôk tung thôn, troăng prôk troh tung klâng chiâk. Troh nôkố, dâng 450 rơpŏng kuăn pơlê hiăng pleăng dêi tơnêi, tơmeăm khoăng vâ po rơdâ 30 to troăng prôk a 11 to thôn, pơlê, ƀă tâi tâng ki xŏn lối 12 km 4. Ối a thôn Yên Phú 2, jâ Vũ Thị Lý tối kô pâm ‘nhiê kơnâng ki meăn pro lĕm dêi rơpŏng hngêi vâ ăm pro troăng. Tiô jâ Lý, hdrối vâ tơbleăng pêi, kăn ƀô̆ pơlê cheăm hên hdrối lăm tối ăm kuăn pơlê ‘nâi nhên vâ kuăn pơlê hlê ‘na troăng ki vâ po rơdâ mê, rơpŏng hngêi tơná pin xuân châ xúa há.  

“Po rơdâ troăng prôk nôkố hiăng ai hên rơxế kơtâu, tung pơlê hiăng ai tá ô tô, nôkố châ Đảng ƀă tơnêi têa tơmâng, tŏng gum ngăn khât, phiu ro ‘nâng, po rơdâ troăng prôk á vâ ‘nhiê dêi kơnâng ki meăn pro lĕm mê vâ ăm po rơdâ troăng prôk”.

Sap ing mơ’nui hơnăm 2025 troh nôkố, cheăm Ia Hiao hiăng ‘no liăn dâng 3 rơtal 600 rơtuh liăn kô pro klêi troăng prôk ƀă po troăng cho mơ’no têa tung klâng a tơnêi rơdâ lối 40 ha. Tiô tối hdrối kô pơtối ‘nhiê tah mâu kơ’noăng klâng ki kŭn, pro klâng kân rơdâ, vâ hlâu drêng djâ kơmăi pơchoh klâng ƀă drêng kơmăi lăm pôe báu, mơdêk ki châ tơƀrê hên hlối pơxúa tung pêi klâng, chiâk.

Mâu kơxô̆ liăn ‘no pro bú ối môi pâ tung tơdroăng tối hơ’muăn. Tơdroăng ki kal tâ cho tơmeăm khoăng châ ăm drăng lâi ƀă tơleăng mơnhên mâu tơdroăng kuăn pơlê kal vâ. A ƀuôn Ma Hrai. Pôa Nay Hak ai lối môi sào tơnêi klâng hiăng pêi tung hên hơnăm. Hdrối nah, rơpŏng pôa pêi cheăng kơnôm ki hên to ing krong prâi. Kong mêi tro têa kân têa lu, kong tô ó kô khăng khoăng; ai rơnó ki ‘nâ pêi ôh tá châ kâ, ai rơnó ki ‘nâ châ bú iâ. Drêng hiăng ai rơchôa hno têa châ ‘no liăn mơjiâng pro, têa troh a klâng tơniăn, ki tô tuăn dêi mâu ngế pêt báu môi tiah rơpŏng pôa Nay Hak xuân hiăng hmiân tuăn tâ.

“Rơpŏng hngêi á ai lối 1 sao klâng pêi hiăng hên hơnăm kố, ai hơnăm tro têa lu ôh tá châ ki klâi, ai hơnăm kong tô mơdrăng bú châ xo iâ ôh tá hên to lâi. Kơnôm ai ‘noăng cho mơ’no têa châ ’no liăn pro lĕm ai têa tôh tơniăn mê a phiu ro ‘nâng”.

Hlá mơ-éa Pơkâ Hneăng hôp Đảng ƀô̆ cheăm Ia Hiao hneăng 2025-2030 ai tối kô po rơdâ mâu tơdroăng kal tung mơjiâng mâu kăn pêi cheăng pơxúa ăm kuăn pơlê,… hriăn mơjiâng, pêi cheăng tơdrăng lĕm, xo kuăn pơlê ƀă khu mơdró pro mâu ki xiâm. Kố xuân cho túa ki cheăm bêng pơ’lêh pêi ing tơdroăng Hnê mơhno Kơxô̆ 05 dêi Khu xiâm kal kí ‘na “Mơdêk hriâm tâp ƀă pêi pro tiô troăng tơdjâ hiâm mơno ki lĕm, túa pêi cheăng Hồ Chí Minh, malối cho pơkâ ‘na hnoăng pêi pro djâ troăng lĕm ahdrối, lĕm tung pêi cheăng, troăng hơlâ pêi cheăng tro tiô khoa hok, kuăn pơlê môi tuăn, achê hmâ ƀă kuăn pơlê, xua ing kuăn pơlê.

A cheăm Ia Hiao, tơdroăng ki mê châ pơxiâm ing tơdroăng kăn ƀô̆ lăm troh a pơlê cheăm, tơdrêng ƀă pêi pro mâu tơdroăng kuăn pơlê rơhêng vâ ‘nâi, teăng hdrối nah hâi tơngah a tơdroăng ki chêh tối tơbleăng. Pôa Bùi Hữu Tâm, Phŏ Kăn hnê  Đảng ủi cheăm Ia Hiao, vâ ai hlá mơ-éa pơkâ tro mê ki hdrối kăn ƀô̆ thế achê kuăn pơlê, hlê kuăn pơlê ‘mơnúa pơtih dêi tơná cho kuăn pơlê dế trâm tơdroăng pá.

“Hmâ ƀă kuăn pơlê, achê hlối tơmâng vâ’nâi mâu tơdroăng púi vâ dêi kuăn pơlê cho tơdroăng ki kal má môi. Ai tơmâng hên tâ ‘na kuăn pơlê mê nếo ‘nâi tơdroăng púi vâ dêi kuăn pơlê ƀă tơbleăng mâu troăng hnê mơhno, Tâng hơngế ing kuăn pơlê klêi mê tơmâng tối tơbleăng tê ki mê pá. Mê nếo thế mơnúa pơtih mâu ngế kăn ƀô̆ tâng vâi kuăn pơlê mê thế ton tơrŏng hía to lâi met tơnêi, ‘nhiê kơnâng mê pó hôm khíu há hôm mơjo dêi há, pơtih tơná cho ngế ki thế ăm pleăng dêi tơnêi klêi mê hlối mơhnhôk kuăn pơlê. Drêng hiăng chiâng pro ti mê kuăn pơlê hlo kăn ƀô̆ ‘nâi hlê plĕng tuăn tơmiât dêi kuăn pơlê ƀă hlê tơdroăng ki ối tơvâ tơvân mê vâi kô veăng môi tuăn ƀă pin”.

A Ia Hiao, mâu troăng po rơdâ, mâu rơchôa mơ’no troh tung klâng choâ pro klêi, vâ hlâu ăm kuăn pơlê mơnhông pêi klâng chiâk, mơdêk pê lo hên kế tơmeăm. Ing mâu tơdroăng pêi nhên, mâu kăn cheăm bêng dế chôa lâng pê klêi mâu troăng pơkâ xo kuăn pơlê pro xiâm, xo ki tơƀrê  vâ pơxúa ăm kuăn pơlê pro loăng rêk hdró ki djâ troăng lĕm. Mê xuân cho túa ki kăn ƀô̆, đảng viên ối a Ia Hiao hriâm tâp hlối pêi pro tiô troăng tơdjâ tuăn mơno ki lĕm, túa pêi cheăng dêi Hồ Chí Minh, pơxiâm ing mâu tơdroăng cheăng pêi kŭn la ai pơxúa, rơtế ƀă tơdroăng rêh ối ƀă tơdroăng kal vâ dêi kuăn pơlê.