Sap apoăng hơnăm troh nôkố, mâu ƀơrô Khu pơkuâ hnê ngăn cheăng Đảng kong pơlê Dak Lak đi đo pêi cheăng thâ rĕng klêi. Ing tơdroăng chêh hlá mơ-éa, tơkŭm po mâu rôh hôp troh tơleăng mơnhên mâu tơdroăng nếo ai hlối pêi thế rĕng, hlối ôh tá xôi. Tiô nâ Kim Thị Hoài Thương, chuyên viên tung ƀơrô, tơdroăng cheăng thâ pêi mê hlối vâ ai tiô tơdroăng tăng nâi plĕng mâu tơdroăng ‘na tơ’mot, xing xoăng rah, pro rế lĕm mơngế pêi cheăng ăm tơnêi têa, hlối cho pơkâ thế tối tro ki tơƀrê tơdroăng cheăng pêi rêm khế:

“Drêng pin tối rêm khế mê hâi chôu pêi cheăng gá iâ tâ mê pin kô hlo nhên tơrêm tơdroăng cheăng, malối tâng tung pơla pêi cheăng mê lơ ai tro xôi ‘lo kô rĕng châ ‘nâi châ hlo tơdrêng hlối ƀă rĕng rơnêu tơdrêng mê ôh tá chiâng tơ kôm troh mơ’nui hơnăm nếo  tối ki ôh tá tro, ki hâi teăm tro klêi mê nếo rơnêu. A tơmiât tơbleăng pơkâ luât môi tiah mê kô gum ăm rêm ngế hlo teăm tơdrêng, mâi rơnêu teăm ƀă tối teăm há, ing mê xuân tro khât tâ”.

Ôh tá xê pơtê to a tơdroăng tối mơngế ki mê, luât pơkâ nếo ối xúa ƀă khu pú hên mâu khu veăng ki kố ki mê. Jâ Nguyễn Thị Hồng Thúy, Ngế pơkuâ xiâm ƀơrô Khu kăn pơkuâ hnê ngăn Đảng kong pơlê, tối tiah kố, kố cho môi tơdroăng kal ki nếo, kal thế mâu ngế pơkuâ ƀơrô kơvâ cheăng thế ngăn nhên tơdroăng cheăng dêi mâu ngế tung ƀơrô, thế pêi tơniăn tối tro tơdroăng cheăng pêi ƀă tơdroăng cheăng ki hiăng pê klêi.

“Klêi pơkâ châ tơbleăng thế pêi xuân hnê tối nhên troh mâu ngế pơkuâ ƀơrô kơvâ cheăng ki mê, xua kố cho mâu kăn pơkuâ ngăn nhên tơdroăng cheăng dêi nhŏng o tung veăng tơná pin. Ing tơdroăng tối mê ai tơbleăng nhên tơdroăng cheăng pê klêi tung môi khế dêi ngế pơkuâ ƀơrô dêi tâi tâng tung veăng klêi mê tối tơdroăng cheăng pêi nhên dêi tơrêm ngế xuân môi tiah tơdroăng cheăng ki pê klêi’’.

Tiô pôa Nguyễn Thượng Hải, ngế pơkuâ Khu tơrŭm cheăng Đảng kong pơlê Dak Lak, tơdroănng tối ăm ‘nâi mâu kăn ƀô̆ tiô troăng pêi cheăng ki nếo, riân tá kơxô̆ tơdroăng cheăng ƀă ki pá dêi tơrêm tơdroăng cheăng, ôh tá xê to gum châ 'nâi ƀă ăm hriâm tơ’nôm mâu ngế ki ai tuăn rơkê ivá mơ-eăm mê ối veăng ‘mâi rơnêu lơ ăm hriâm tơ’nôm ƀă mâu ngế  ki hâi ai tiô tơdroăng pơkâ.

Kơ’nâi 3 khế tơbleăng, luât ki nếo pơxiâm xúa hlo hiăng pơ’lêh. Kăn ƀô̆, kŏng chưk tung kơ koan hiăng hlê tâ, hbrâ séa ngăn tơdroăng cheăng pêi ƀă kơdroh pêi xôi tung tơdroăng tăng ‘nâi plĕng. Laga, tiô mâu kăn Khu tơrŭm cheăng Đảng kong pơlê, xuân ối tơdroăng ki nhoăm, ôh khên tối tơdrăng ki xôi dêi ngế ki mê. Xua mê, tung la ngiâ, Khu kố kô pơ tối hnê tối nhên, tơdrăng, tơniăn tối tro ivá tơdroăng cheăng dêi tơrêm kăn ƀô̆.

“Ki khât vâ tối, mâu ngoh o apoăng xuân hâi hmâ, hlo pêi khât kơtăng luâ râ, nôkố mâu ngoh o hlo hiăng hmâ, ƀă vâi hiăng vâ môi tuăn, hlo nhên ngế ki lâi chiâng pêi cheăng ‘nâi nhên dêi tơdroăng cheăng, ngế ki lâi hâi chiâng pêi cheăng cho hâi chiâng ôh há. Sap ing nah pin hmếo pro tơ’mô, tơdroăng ki lâi xuân lĕm pơtâi mê mơngế ki pêi tro tơdroăng mê vâi ôh tá vâ, xua mâu ngế ki tá ôh tá veăng pêi cheăng môi tiah á la xuân tối gá pêi cheăng lĕm tro môi tiah á, ki mê ôh ta chiâng, mê mâu ngoh o vâ môi tuăn ƀă môi tiah mê tung kơ koan tíu pêi cheăng, thế rah xo mâu ngoh o ki  pêi cheăng kơhnâ rơkê’’.

Tơdroăng pơ’lêh nếo tung tơdroăng tối vâ ‘nâi mâu kăn ƀô̆ a Khu kăn pơkuâ hnê ngăn Đảng kong pơlê Dak Lak hiăng ƀă dế pro pơxúa tơƀrê khât, pro xiâm vâ mâu kăn ƀô̆ mơ-eăm ƀă mơdêk ki tơƀrê tung tơdroăng cheăng. Tâng tơbleăng pêi pro tro kơtăng, túa pêi cheăng ki kố kô po rơdâ troh mâu kơ koan, tíu pêi cheăng ki ê tung kong pơlê, veăng mơnhông  ki tơƀrê tơdroăng cheăng dêi kăn ƀô̆, mâu kăn pơkuâ, pêi tro tâ nếo tơdroăng mơjiâng Đảng ƀă tơdroăng cheăng kal kí.