Tơdroăng kố hiăng hlo chía hên a Dak Lak a Rôh tơbleăng Sầu riêng pơla kố nah. A mâu cheăm Krông Pač, Ea Knuêč, Cư Mgar, Krông Ƀuk, Quảng Phú, Ea Tul, Krông Năng, bêng Čư̆ Bao ƀă kơpong mơđah tơbleăng tơmeăm OCOP dêi kong pơlê Dak Lak hiăng tơkŭm po 16 rôh livestream tung Facebook, TikTok Shop ƀă mâu tíu tê mơdró tung điê̆n tưh. Mâu rôh livestream tơ’mot lối 4 rơtuh ngế ngăn, dâng 8.700 tơmeăm vâi roê, lối 146 tâ̆n sầu riêng châ tê, kơxô̆ liăn châ xo dâng 1 rơtal.

Ki rơhêng vâ tối tâ cho mâu tơdroăng ki mê gá ối a mâu ngế ki tâng tơpui a ngiâ kơmăi xup hrik. Mê ôh tá xê to mâu KOL, KOC (mâu ngế ki vâi ô eăng, lơ mâu ngế ki tê tơmeăm rơkê. Hên kăn ƀô̆, kăn pơkuâ cheăm, Đoân Droh rơtăm, khu mơdró kâ, khu pêi cheăng tơrŭm ƀă xua mâu ngế kuăn pơlê pêi chiâk xuân châ mot tung um tơvi.

A cheăm Ea Knuêč, jâ Ngô Thị Minh Trinh, Kăn hnê ngăn Kuăn pơlê pêi chiâk cheăm hiăng veăng tung rôh livestream, tơbleăng ƀă tê sầu riêng ăm kuăn pơlê. A hên cheăm bêng ki ê, kăn ƀô̆ cheăm xuân veăng pro ngế ki tê tơmeăm, rơtế ƀă kuăn pơlê hơ’muăn ‘na kơpong tơnêi, kơdrum loăng ƀă tơmeăm dêi cheăm.

Chiâng vâ tối, ai mâu kăn ƀô̆ a cheăm pơlê dế chiâng mâu ngế ki teăng mâ ‘na tơdroăng ki hnê xúa internet dêi tơmeăm pêi lo ing chiâk deăng Tây Nguyên. Tơdroăng kố xuân ăm hlo livestream ôh tá xê to môi túa ki tê tơmeăm. Ing mâu rôh livestream, ngế ki roê ối châ ngăn hlo kơpong pêt, ngế pêt, tung pơla rak ngăn mâu tơmeăm ƀă tá ki lĕm dêi kơpong tơnêi Tây Nguyên.

Vâ gum mâu khu ki pêi mơjiâng tơmeăm OCOP mơdêk ‘na mơđah tơbleăng ƀă tê tơmeăm ing troăng hyôh internet, pơla kố nah, Khu ngăn Khoa hok ƀă Kong ngê̆ kong pơlê Dak Lak hiăng tơkŭm po tơdroăng hnê ‘na “Kih năng livestream tê tơmeăm ing troăng hyôh internet”, ăm khu mơdró kâ, khu pêi cheăng tơrŭm ƀă rơpŏng tê mơdró. Mâu ngế hriâm châ vâi hnê ‘na troăng ki tê tơmeăm ƀă mơjiâng pro inâi tung troăng hyôh măng; túa ki mơjiâng tơdroăng kal, hlá mơ-éa livestream; ki rơkê dêi tơdroăng tơbleăng, tơrŭm ƀă tơleăng mâu tơdroăng ki trâm tung pơla tê tơmeăm ing troăng hyôh internet.

Mâu khu ki rơkê xuân hnê túa ki mơjiâng pro um krê tro ƀă inâi tơmeăm, tí tăng tơƀrê tơdroăng ki xúa măng xah hô̆i, tíu tê mơdró điê̆n tưh ƀă xúa túa tơmiât pơhlêh xúa hyôh internet tung mơđah tơbleăng tơmeăm OCOP.

Rôh po hriâm tâp ƀă 5 rôh livestream a Tíu pêi cheăng Pơhlêh nếo tơmiât pêi rơkê ƀă a mâu cheăm bêng môi tiah Tuy Hòa, Tây Hòa, Krông Năng, Buôn Ma Thuột. Ing mê, mâu khu pơkuâ kô châ hnê pêi pro, rêm tơdroăng pêi mơjiâng chiâng tơdroăng ki hmâ ƀă mơjiâng pro ƀâng tê tê tơmeăm ing troăng hyôh internet tơtro ƀă tơmeăm dêi tơná pêi lo.

Pôa Trần Văn Sơn, Phŏ pơkuâ ngăn ‘na Khoa hok ƀă Kong ngê̆ kong pơlê Dak Lak ăm ‘nâi, klêi kơ’nâi mâu tơdroăng ki pêi mơnúa ngăn, Khu kô séa ngăn tâi tâng, ƀă hlối pêi pro klêi pơkâ vâ mâu cheăm chiâng vâ xúa, tơbleăng pêi ăm tơtro ƀă tơdroăng ki ai khât.

“Klêi kơ’nâi pêi mơnúa ngăn, ngin kô vêh séa ngăn túa xúa vâ ăm mâu cheăm chiâng vâ xúa ƀă tơbleăng pêi, malối cho athế ai môi tíu pêi cheăng rơtế prôk. Ƀă tíu pêi cheăng rơtế prôk mê kô rơtế pêi ƀă mâu cheăm vâ mơjiâng mâu tíu tê tơmeăm livestream, malối cho mâu tơmeăm ki lĕm, tơmeăm OCOP dêi kong pơlê tê tung tíu tê mơdró điê̆n tưh”.

Laga, livestream tê tơmeăm ôh tá xê khoă ki hngăm vâ chêh pro mâu tơdroăng ki vâ châ tê tơmeăm pêi lo ing chiâk deăng. Môi rôh tê tơmeăm gá djâ vêh lối rơpâu hlá phĭu, la vâ châ rak tơmối, tơmeăm xuân athế rak tơniăn ki lĕm; tơmeăm athế ai xiâm kối hleăng nhên; tơdroăng ki tâ tung kơhôp, ‘măn rak, pơto chơ athế rơkê. Hngế tâ nếo cho tơdroăng mơjiâng inâi ƀă tơrŭm pêt krá tơniăn ton.