Ƀă Tây Nguyên – Nam Trung bộ, ing môi kơpong ối hên pá puât, nôkố hiăng mơnhên hnoăng ki kal ‘na cheăng kâ, gâk kring tơnêi têa – kring tơniăn, pro xiâm kối vâ pêi pro troăng tơmiêt mơnhông ton xŏn dêi ‘’chal ki vâ rơxông’’. Pôa Hoàng Công Khiêm, Phŏ Kăn pơkuâ hnê mơhno má môi Đảng ŭy bêng Xuân Trường – Đà Lạt, kong pơlê Lâm Đồng tối:

‘’Kăn ƀô̆, đảng viên ƀă Kuăn pơlê loi tơngah, ƀă ivá ó rơdêi tơrŭm môi tuăn, rêm ngế kuăn pơlê mơnhông tơdroăng pói vâ, mơ-eăm xêh, rơdêi xêh mê tơnêi têa kô mơnhông mơdêk, Kuăn pơlê phâi hơtô, hơniêp ro’’.

Ki má môi dêi Mơ-éa ki kal Hneăng hôp má XIV dêi Đảng cho mơnhên troăng pêi tơtêk nếo, xo khoa hok – kŏng ngê̆, pơhlêh nếo tơmiêt pêi rơkê ƀă pơlêh xúa kŏng ngê̆ kơxô̆ pro ivá mơhnhôk ki xiâm. Ƀă Tây Nguyên, troăng pêi kố po roh tơ’lêi hlâu vêh pêi chiâk deăng tiô troăng kŏng ngê̆ rơxông nếo, cheăng kâ krúa lĕm kong prâi, têk chu chu têk, mơdêk ki kơnâ tơtêk. Ƀă Nam Trung bộ, ki má lối cho mâu kong pơlê kĭng têa kơxĭ, kố cho xiâm kối vâ mơnhông cheăng kâ krúa lĕm kong prâi, ôm hyô mơdêk, on tơhrik ki vêh pro ƀă logistics rơxông nếo. Mơ-éa ki kal Hneăng hôp má XIV dêi Đảng xua mê ôh tá xê to pơkâ mơ’no troăng pêi la ngiâ tơdjuôm, mê ối po troăng mơnhông tơtro ƀă tơdroăng ki phá tơ-ê dêi rêm kơpong. Đảng viên Mai Văn Tuấn ối a bêng Phù Đổng, kong pơlê Gia Lai tối:

‘’Mơ-éa ki kal Hneăng hôp má XIV dêi Đảng mơnhên khoa hok kŏng ngê̆, pơhlêh xúa kŏng ngê̆ cho ivá mơhnhôk mơnhông mơdêk, ƀă ngin a cheăm mê cho tơ’lêi hlâu, pro ti lâi vâ tơmeăm pêi lo ing chiâk deăng tê châ yă ƀă kơdroh ki ôh tá tơniăn. Tơdroăng pơhlêh xúa kŏng ngê̆ ôh tá xê tơdroăng ki kân ki klâi ôh, ai tíu kơpong pêt, ai nhât kĭ điên tưh, ai mah tăng xiâm kối mê tơmeăm nếo châ tê tung kơchơ mơdró kân’’.

Môi tơdroăng ki má môi ki ê tung Mơ-éa ki kal Hneăng hôp má XIV dêi Đảng cho tối rơdêi pơkâ pêi inhên: tối hlối pêi; pơkâ xiâm, hnoăng cheăng, troăng pêi inhên; hlối pôu râng hnoăng ƀă tơdroăng ki châ tơƀrê; xo tơdroăng ki môi tuăn dêi Kuăn pơlê pro loăng rĕk ki châ tơƀrê pêi pro. Tơdroăng pơtâng hnê tối kố ai kơnâ phá tơ-ê ƀă Tây Nguyên – Nam Trung bộ, tíu dế trâm hên pơloăng mơnúa môi tiah kong prâi hơ’lêh, kong prâi ôh tá tơniăn, ôh tá tŭm tơdjêp hngêi trăng troăng klông, cheăng pêi krá tơniăn ăm kuăn pơlê kơpong hơhngế, hơhngo, kơpong kuăn pơlê hdroâng kuăn ngo. Đảng viên Nay Lợi, hdroâng kuăn ngo Jarai, cheăm Ia Hiao, kong pơlê Gia Lai tối:

‘’Á hlê plĕng trâu má môi cho kăn ƀô̆ tơpui thế pêi, tơpui iâ pêi hên, ƀă pêi mê thế ki pơxúa dêi kuăn pơlê cho ahdrối’’.

Tung Mơ-éa ki kal Hneăng hôp má XIV dêi Đảng cho mơnhên hnoăng tíu xiâm dêi Kuăn pơlê tung rêm troăng pêi cheăng ton xŏn mơnhông mơdêk. Ƀă Tây Nguyên – Nam Trung bộ, tíu ai tơdroăng ki hên hĭn ‘na hdroâng mơngế, tơdroăng loi tĭng tiô khôp ƀă tơdroăng rêh ối, hiêm mơno kố thăm kơnâ tung tơdroăng pro krá tơdroăng tơrŭm môi tuăn tâi tâng hdroâng mơngế, rak tơniăn kal kí – rêh ối pơlê pơla. Krâ pơlê Điểu Xem, hdroâng kuăn ngo M’Nông, cheăm Kiến Đức (Lâm Đồng) tối:

‘’Drêng Đảng mơnhên Kuăn pơlê cho tíu xiâm, kăn pơlê loi tơngah. Troăng hơlâ tơtro ƀă tơdroăng rêh ối, kăn ƀô̆ tơmâng kuăn pơlê mơhé pá to lâi, kuăn pơlê xuân hbrâ môi hiêm mơno. Rŭm môi tuăn mê mơni pơlê tơniăn, tơnêi têa mơnhông mơdêk’’.

Ing mơ-éa ki kal Hneăng hôp má XIV dêi Đảng kô hlo, ‘’Chal xông mơ-eăm’’ ôh tá xê to pơxiâm ing mâu troăng mơnhên prôk ton xŏn, mê ing tơdroăng ki pơhlêh păng ‘nâng tá khu cheăng kal kí ƀă tơdroăng môi tuăn dêi kuăn pơlê. Drêng troăng tơmiêt mơnhông mơdêk nếo châ pêi pro ƀă mâu tơdroăng pêi inhên, Tây Nguyên – Nam Trung bô kô chiâng vâ mơnhông, veăng gum rế hía rế rơdêi tung tơdroăng mơnhông tơdjuôm dêi tơnêi têa./.