A tơkăng kong Dak Lak, hơnăm hriâm kố ai môi tơdroăng ki kal vâ ‘nâi: mâu hngêi trung hriâm ai tíu kâ koi ối pơtê péa râ châ ‘no liăn pro dế hiăng vâ châ xúa, pro tơ’lêi hlâu tung hriâm tâp, kâ koi ối pơtê tơniăn lĕm tâ ăm hok tro kơpong tơkăng kong. Pái to hngêi trung hriâm ai tíu kâ koi ối pơtê a péa râ a mâu cheăm Ia R’vê, Ia Lốp ƀă Buôn Đôn châ tơbleăng pro ƀă tơdroăng ki tơdah lối 3.000 ngế hok tro hriâm tung hơnăm hriâm 2026-2027.

Kố cho mâu hngêi trung ki châ ‘no liăn pro tơdâng tơ’mô ôh tá xê ai kơbong hriâm mê ối ai kơpong kâ koi ối pơtê, hngêi ‘măn rak mơ-éa, ƀă mâu kơbong xúa ăm tơdroăng pơtâp ivá xah hêi ăm hok tro.

Krê Hngêi trung hdrông kuăn ngo ai tíu kâ koi ối pơtê péa râ Ia R’vê ai tâi tâng kơlo liăn pro 185 rơtal. Vâ teăm châ xúa, lối chât ngế kăn ƀô̆, mố đô̆i rơtế ƀă kŏng nhân hiăng veăng pro, pêi cheăng pơtối a tíu ki mơjiâng pro hngêi trung. Vêh pôu ngăn hngêi trung klăng hơnăm hriâm nếo, Thươ̆ng tươ̆ng Phùng Sĩ Tấn, Phŏ tí tăng ‘nâi plĕng Mố đô̆i Kuăn pơlê Việt Nam ăm ‘nâi, hngêi trung kố cho tơdroăng mơhno ki lĕm dêi lêng ƀă kuăn pơlê:

“Khu kăn pơkuâ hnê ngăn Đảng lêng Tơnêi têa, Khu xiâm ngăn lêng, Khu lêng loi khât tiah kố, drêng ai hngêi trung hriâm kô pêi pro châ tơdroăng ki rơhêng vâ ai ngế hnê rơkê, hnê mơjiâng kăn ƀô̆ kuăn pơlê hdrông kuăn ngo. Ing mê, kô hnê ai mâu kăn ƀô̆, pro ivá vâ pin pêi pro tro hnoăng cheăng mơnhông cheăng kâ rêh ối pơlê pơla, ‘mâi mơnhông tơdroăng gâk kring cheăm bêng, malối cho tíu ki ối ai hên xơpá môi tiah Ea Rốk”.

Mâu kơxô̆ ki mê, tâng bu ngăn to a hlá mơ-éa, bu cho kơxô̆ liăn ‘no pêi cheăng lơ kơxô̆ ngế hok tro. La peăng pá rŏng mê cho tơdroăng dêi mâu vâi hdrêng kơpong tơkăng kong. Ƀă hên mâu vâi o, châ hriâm tâp tung môi hngêi trung ki lĕm kâk, ai tíu kâ koi ối pơtê tung hngêi trung hlối ƀă tơdroăng ki tơ’lêi hlâu ‘na troăng prôk troh a lâm gá chía kơdroh iâ ki hngế, cheăng hriâm tâp tơniăn gá tơniăn tâ ƀă tơdroăng châ hriâm tâp xuân tơ’lêi hlâu tâ.

Tâng a tíu tơkăng kong, mâu hngêi trung nếo dế po tơ’nôm rôh tơ’lêi hlâu ăm vâi hdrêng, mê a Trường Sa, rêm lâm, gá pro pơxúa krê. Tung dế têa kơxĭ, thái cô ƀă hok tro xuân tơdah hơnăm hriâm nếo tung idrâp chuât dêi hơkâ châ tôu pơxiâm ăm hơnăm hriâm nếo, thái cô ƀă hok tro a chuăn rơlố hngế ôh tá xê to tíu ki hnê hriâm ăm tơdroăng ki rơkê plĕng, mê ối cho mâu tơdroăng ki hnê bâ eăng tối rơdêi tơdroăng rêh ối dêi kuăn pơlê Việt Nam tíu chuăn rơlố Tơnêi têa.

Sap ing Tây Nguyên troh Trường Sa, kơtăn ‘na tơnêi tơníu lối hrĭng, lối rơpâu km. Tơdroăng hriâm tâp xuân phá dêi pó. La tung hâi pơxiâm mot hơnăm hriâm, tâi tâng rơtế tơdjuôm môi tơdroăng: rêm ngế vâi hdrêng, maluâ a tíu tơkăng kong lơ a chuăn rơlốu têa kơxĭ, pơrá kal châ gum ăm tơdroăng hriâm tâp ƀă mơnhông.

Xua mê, idrâp chuâp dêi hơkâ a hâi pơxiâm po hơnăm hriâm nếo hơnăm kố ôh tá xê tơbleăng ăm môi hơnăm hriâm nếo. Mê ối cho idrâp hơkâ dêi mâu hngêi trung nếo a tíu tơkăng kong; dêi mâu lâm hriâm a têa kơxĭ; dêi tơdroăng ‘no liăn pro ăm hok tro ƀă xuân cho tơdroăng tơbêng cheăng pêi tung la ngiâ a mâu cheăm bêng ki kal tung lâp tơnêi têa.

Sap ing pơlê cheăm Tây Nguyên troh a chuăn rơlố Trường Sa, mâu kơtâ hlá mơ-éa nếo châ po. Rơtế amê cho mâu tơdroăng rơhêng vâ nếo dêi môi rơxông dế xông kân a tíu ki kal dêi Tơnêi têa.