A pơlê kong xiâm Hà Nội, tung mâu khế apoăng tơbleăng Pơkâ Hneăng hôp XIV Đảng ƀô̆ pơlê kong kân hneăng hơnăm 2025–2030, hên hĭn tơdroăng pơkâ pêi ki kân hiăng châ pêi pro pơhlêh ƀă mâu kế tơmeăm, tơdroăng tơkêa cho tơdroăng ki vâ pêi tung la ngiâ. Péa tơdroăng tơkêa ki kal, mê cho Troăng kân tơnêi tơníu tâ tá kroăng Hồng ƀă Kơpong kơphô̆ pơtâp ivá Olympic châ tơngah pro chiâng hvêa chêng prôk ki mơnhông, po troăng “Tơƀrê mơnhông kroăng Hồng” tung la ngiâ. Pôa Nguyễn Duy Ngọc, Ngế cheăng tung tíu xiâm kal kí, Kăn pơkuâ ngăn Đảng Pơlê kong kân Hà Nội ăm ‘nâi:

“Kố cho 2 tơdroăng tơkêa bro ai pơxúa ki kal khât, veăng gum mơjiâng pơlê kong xiâm, kơpong tơbăng kroăng Hồng ƀă lâp tơnêi têa, tơmiât troh pro chiâng tơƀrê ăm kroăng Hồng, gum ăm tơdroăng pơkâ pêi mơdêk GRDP sap ing 11% tơngi klêng tung hơnăm ƀă tá hneăng, pro chiâng ngiâ méa nếo ăm Pơlê kong xiâm Hà Nội, pleăng hnoăng cheăng, túa lĕm tro, tơmiât pêi rơkê, mơ-eăm tơná chiâng troăng kân kơphô̆ rơkê plĕng ngiât, tơdjêp tung lâp plâi tơnêi”.

Ôh ti xê to Hà Nội, tung lâp tơnêi têa, hên kong pơlê dế tơkŭm pêi mâu tơdroăng tơkêa troăng prôk ki kal, sap ing troăng, kơphô̆, kơpong cheăng ƀă kơmăi kơmok chal nếo troh hngêi trăng troăng klông kong kế nhâ loăng, pro chiâng ivá tơdjâk ăm tơdroăng mơnhông.

Tung pơla lâp plâi tơnêi pơhlêh kân, cheăng kâ dêi Việt Nam pơtối châ rak tơniăn. Pơla hơnăm 2021-2025, GDP tâk châ 6,3%, krê hơnăm 2025 châ 8,02%; túa cheăng kâ tâk 514 rơtal USD, ối má 32 lâp plâi tơnêi; GDP rêm ngế luâ 5.000 USD. Mơhrê liăn ngân châ mơdât, mâu tơdroăng séa ngăn pro tơdâng dêi cheăng kâ châ rak tơniăn. Phŏ Yăo sư Tiê̆n sih Nguyễn Thường Lạng, Hngêi trung Đại học Kinh tế Quốc dân, tối tiah kố mâu tơdroăng kố ai pơxúa khât:

“Kố cho ivá krá tơniăn khât ăm hneăng mơnhông nếo, tung mê kal tơkŭm tung mâu tơdroăng pơhlêh ngiât, pơhlêh kơxô̆; khên tơnôu poê kơdroh mâu mơ-éa, tâk tơ’nôm hnoăng ăm khu mơdró kâ vâ pro chiâng tơdroăng ki rơdêi ‘na cheăng kâ”.

Hơnăm 2025, lâp tơnêi têa ai vâ chê 300 rơpâu khu mơdró kâ mơjiâng nếo ƀă vêh pêi cheăng; tâi tâng kơxô̆ liăn chêh inâi ‘mot tơ’nôm tung cheăng kâ châ vâ chê 6,4 rơtuh rơtal liăn. Kơpong FDI pơtối cho hnoăng cheăng ki kal, ƀă tâi tâng kơxô̆ liăn cheăng tung hơnăm 2021 - 2025 châ lối 158 rơtal USD, ăm hlo ivá tơƀrê dêi tơdroăng ‘no liăn pêi cheăng dêi Việt Nam.

Mot tung hneăng hơnăm 2026 – 2030, ki xiâm pơkâ pêi tâk GDP sap ing 10%/hơnăm ngi klêng châ mơnhên nhên. Mâu tơdroăng tơkêa bro hngêi trăng, troăng klông tung la ngiâ môi tiah pro troăng rơxế lơ treng Peăng Kơnhŏng – Peăng Hdroh, hngêi trăng troăng klông kơxô̆, on tơhrik logistics; rơtế ƀă troăng pơkâ mơnhông cheăng kâ ngiât, cheăng kâ kơxô̆, kơmăi kơmok “Make in Vietnam”, rơtế amê cho tơdroăng cheăng dêi kơvâ cheăng kơmăi kơmok, túa lĕm tro, ôm hyô ƀă hên ki ê kô lôu péa ăm tơdroăng mơnhông nếo dêi tơnêi têa. Ngế ki rơkê ‘na cheăng kâ Tiê̆n sih Lê Duy Bình tối tiah kố:

“Tơdroăng ki mơ-eăm xêh ki hdrối tâ athế châ mơhno a tơdroăng tơniăn ‘na cheăng kâ kân, a ivá pơkuâ xêh troăng hơlâ ki apoăng, tuăn mơno rơkê ƀă mơdêk tíu pêi cheăng dêi cheăng kâ Việt Nam tung rôh mot tơrŭm cheăng ƀă lâp plâi tơnêi”.

Rơtế ƀă thăm mơnhông, mâu tơdroăng mơdêk cheăng tung la ngiâ ‘na troăng hơlâ tŏng gum, hngêi trăng, troăng klông ƀă mâu kơxô̆ liăn châ tơbleăng pêi tơdâng tơ’mô. Hneăng hôp Kuô̆k hô̆i hneăng XV châ mơnhên tối cho hneăng hôp sap nah hâi chói ai, ƀă hên luât, hên tơdroăng pơkâ tŏng gum mâu tơdroăng ki xơpá, pro tơ’lêi hlâu ‘na liăn ngân, pơhlêh rơdêi túa tơmiât pơkuâ ngăn tơdroăng tơmiât pêi rơkê mơnhông, pơtê tơdroăng ki ví, tơpôu cheăng ăm dêi pó. Ƀă tơdroăng ivá krá rơdêi hiăng châ mơjiâng, Yăo sư, Tiê̆n sih Phan Xuân Sơn, Viê̆n trưởng Viê̆n Hriăn plĕng Danh nhân, loi tơngah:

“Á đi đo loi tung tơdroăng pêi pro dêi hdroâng mơngế ƀă loi tung tơdroăng pơkuâ dêi Đảng ƀă hdroâng mơngế pin ai môi hiâm mơno khên tơnôu, môi túa rêh ối tơdrăng, tơmiât pêi rơkê, tơkâ luâ xơpá tung mâu chal. Rôh kố mot tung chal nếo, pin xuân mơnhông ki lĕm mê ƀă Đảng cho kuăn dêi hdroâng mơngế. Nôkố hneăng 14 dêi Đảng cho troăng hơlâ mơjiâng môi Đảng cho pakĭng mâu pơkâ ki ton mê ai hlê plĕng, túa rêh ối lĕm mê kô djâ hdroâng mơngế Việt Nam mot tung tơdroăng rơkê plĕng môi tiah mâu hdroâng mơngế ki hlê plĕng tung lâp plâi tơnêi”.

Ƀă tơdroăng ki loi tơngah khât tung tơdroăng pơkuâ dêi Đảng, ƀă tơdroăng púi rơhêng vâ mơ-eăm dêi tá hdroâng mơngế, xua môi tơnêi têa Việt Nam kro mơdrŏng, hơniâp lĕm, tơxâng ƀă mâu kong têa tung lâp plâi tơnêi, đảng viên ƀă kuăn pơlê tung lâp tơnêi têa loi khât, ƀă tơdroăng pêi pro tơƀrê hiăng pêi châ, ƀă hiâm mơno mơ-eăm xêh, loi tơngah, rơtế ƀă tuăn mơno pơhlêh nếo ƀă pêi pro kơtăng, tơnêi têa pin kô xúa tơƀrê mâu rôh tơ’lêi hlâu, tơkâ luâ mâu pơloăng mơnúa, pêi pro pơhlêh pơkâ pêi mơnhông rĕng ƀă krá tơniăn.