Mâu hâi kố, a rêm hơlâ troăng a cheăm Đăk Ngọk, tơring Đăk Hà, kong pơlê Kon Tum pơrá eăng bâ lĕm hlá cơ reăng. Hâi hdrối nah hdrối tơdah Têt Lo hơnăm nếo Ất Tỵ 2025, Đảng bô̆ cheăm Đăk Ngọc hiăng tơkŭm po châ tơƀrê Hneăng hôp roh má III, hneăng hơnăm 2025 – 2030. Kố cho tơdroăng kal kí ki kal ôh tá xê dêi 239 đảng viên mê ối cho tơdroăng loi tơngah, tơdroăng pói vâ dêi vâ chê 5.000 ngế kuăn pơlê tung cheăm. Pôa Lê Văn Y, thôn Đăk Tin, tối:

“Hơnăm 2013 hâi apoăng nếo mơjiâng Đăk Ngọk ƀă kuăn pơlê hên pá puât, troăng prôk lăm ‘mêi ‘mâk tơdjâk hên troh tơdroăng rêh ối, pêt mơjiâng tơmeăm dêi kuăn pơlê. Tơdroăng pêi 10 hơnăm mơjiâng ƀă mơnhông ƀă môi khu pú kăn pơkuâ môi tuăn, tơrŭm môi tuăn cheăm Đăk Ngọk nôkố hiăng mơnhông ó rơdêi. Nôkố cheăm hiăng pêi kêi đeăng 19/19 túa pơkâ thôn pơlê nếo ƀă tơdroăng rêh ối dêi kuăn pơlê nôkố mê cho phiu ro ‘nâng’’.

Tung hneăng pơla kố nah, 12 chi ƀô̆ ƀă 239 đảng viên dêi cheăm Đăk Ngọk đi đo cho djâ troăng apoăng tung mơnhông cheăng kâ – rêh ối pơlê pơla mơdêk tơdroăng rêh ối kuăn pơlê. Troh nôkố 4/7 thôn dêi cheăm mơnhên thôn pơlê nếo tiô troăng ki nếo, 2 thôn châ mơnhên thôn pơlê nếo kơpong hdroâng kuăn ngo. Tâi tâng cheăm nôkố bu u ối 8 rơpŏng kơtiê. Pôa A Xen, hdroâng kuăn ngo Rơteăng, ối a pơlê Đăk KDem, tối ăm ‘nâi:

‘’Hdrối nah mê pơlê xuân pá puât ‘nâng, sap ing 2 hơnăm kố mê kuăn pơlê rơkê pơhlêh hdrê pêt, mơnăn păn. Kuăn pơlê ki hên pêi báu klâng ƀă pêt kơphế. Xuân kơnôm tơdroăng tơmâng dêi Đảng, khu râ kăn pơkuâ troh pơlê ing mê kuăn pơlê nôkố hiăng xông mơ-eăm’’.

Hneăng hiăng hluâ, tung 26 tuá pơkâ cheăm Đăk Ngọk pêi kêi đeăng ai hên túa pơkâ ki kal châ tơƀrê má môi, trối: pêi lo liăn rêm pơ’leăng mâ mơngế châ lối 70 rơtuh liăn, mơjiâng cheăm châ plah thôn pơlê nếo ki tơtêk; kơdroh kơxô̆ rơpŏng kơtiê rĕng. Pôa Phan Tiến Dũng, Kăn pơkuâ hnê ngăn Chi ƀô̆ hlối pro Kăn pơkuâ tơdroăng măt trâ̆n thôn Đăk Bình, tối túa ki rơkê tơtro mơjiâng thôn pơlê tiô túa nếo:

‘’Chi ƀô̆ pơkuâ ƀă pơkâ rêm khế. Pơtâng tối vâi krâ kuăn pơlê pêi pro tŭm mâu pơkâ. 19 túa pơkâ nôkố hiăng châ ƀă ngin hiăng chiâng môi thôn pơlê tiô túa nếo apoăng hơnăm 2024 châ Vi ƀan tơring mơnhên. Ing môi thôn pêi to chiâk deăng apoăng hneăng nếo 55 rơtuh liăn/môi ngế troh mơ’nui hneăng châ vâ chê 80 rơtuh liăn/môi ngế. Ƀă tơdroăng ki kơdo mơ-eăm dêi tá khu cheăng kal kí djâ hơtô hơniâp lĕm ăm kuăn pơlê’’.

Pơhlêh troăng tơmiât tung pêi cheăng pêt mơjiâng tơmeăm dêi kuăn pơlê hiăng mơjiâng tơdroăng rêh ối nếo ăm thôn pơlê Đăk Ngọk. Cheăm hiăng mơjiâng châ 6 tôh tơrŭm cheăng ƀă 2 tôh tơrŭm cheăng. Tơdroăng mơnhông cheăng kâ khu pú hên hiăng gum mơdêk pêi lo tơmeăm khoăng tung pêi cheăng, ki kơnâ dêi lối 450 hectar báu, lối 1.600 hectar kơphế rơtế hrĭng hectar plâi kâ ƀă loăng pơkeăng. Ƀă khŏm mơ-eăm pơtối mơnhông cheăng kâ rêh ối pơlê pơla krá tơniăn, Hneăng hôp kăn teăng mâ Đảng ƀô̆ cheăm Đăk Ngọk hneăng hơnăm 2025 – 2030 mơnhên, mơjiâng cheăm châ plah thôn pơlê nếo tiô túa nếo, pêi lo liăn rêm pơ’leăng mâ mơngế châ lối 78 rơtuh liăn/hơnăm... Jâ Y Sương, Phŏ Kăn pơkuâ Đảng ŭy, Kăn hnê ngăn Vi ƀan cheăm Đăk Ngọk, tối ăm ‘nâi:

‘’Đảng ƀô̆ hnê mơhno mâu kơvâ cheăng, khu râ, kơvâ cheăng ƀă mâu tơdroăng pêi, pơkâ pêi ki nhên vâ pêi pro rêm hơnăm ƀă rêm hneăng. Mơhnhôk tơdroăng ki veăng dêi tâi tâng kuăn pơlê tung cheăm, tung tơdroăng mơjiâng thôn pơlê nếo tiô troăng nếo. Rơtế amê mơdêk tơdroăng djâ troăng ahdrối dêi ngế ối a ko ƀă pôu râng hnoăng cheăng dêi ngế ki tơbleăng pêi pro mâu tơdroăng xiâm tơdroăng cheăng. Tơkŭm a mâu hnoăng cheăng, troăng pêi vâ mơnhông cheăng kâ - rêh ối pơlê pơla, gâk kring tơnêi têa ƀă mơjiâng tơdroăng cheăng kal kí tung cheăm. Tơmâng tŏng gum pơlê pơla, ‘na hdroâng kuăn ngo, tơdroăng tiô khôp ăm tơtro ƀă tơniăn’’.

Tơdroăng ki pơhlêh tơná ó rơdêi dêi cheăm Đăk Ngọk, tơring Đăk Hà, kong pơlê Kon Tum tung mâu hơnăm hiăng hluâ cho mơnhên inhên ‘na tơdroăng pơkuâ tơtro dêi khu tơrŭm cheăng Đảng ƀă hiâm mơno kuăn pơlê tơrŭm môi tuăn. Pơtối tơdroăng ƀlêi trâng, Đăk Ngọk loi tơngah tơdah hơnăm nếo 2025 krá tơniăn troh pơkâ mơjiâng pơlê xiâm kro mơdrŏng lĕm, tiô troăng ki nếo.