VOV4.Xơ Đăng - Hâi lơ 20/1, Khu kăn ki pêi dêi hnoăng cheăng dêi Tơnêi têa xua jâ Bùi Thị Minh Hoài, Kăn pơkuâ ngăn Tíu xiâm Đảng, Kăn xiâm hnê mơhnhôk Tơnêi têa pơkua djâ khu kăn kố, hiăng lăm pôu, rơkâu Têt, hbru tơmeăm ăm mâu rơpŏng ki ai troăng hơlâ tŏng kum, mâu ngế kơtiê, kŏng nhân pêi cheăng xơpá rôh Têt Lo hơnăm nếo Nhâm Dần 2022 a kong pơlê Dak Nông.

Jâ Bùi Thị Minh Hoài, kăn xiâm Hnê mơhnhôk Tơnêi têa diâp tơmeăm ăm rơpŏng kơtiê, kŏng nhân pêi cheăng xơpá

Khu kăn kố hiăng diâp 350 hnoăng cheăng tơmeăm sap ing kơxô̆ liăn dêi Vi ƀan xiâm Măt trâ̆n Tơnêi têa Việt Nam ăm mâu rơpŏng ki ai troăng hơlâ tŏng kum, rơpŏng xơpá, rơpŏng kơtiê; 200 hnoăng tơmeăm dêi Khu xiâm ngăn tơdroăng cheăng Việt Nam ăm 200 ngế kŏng nhân pêi cheăng ki xơpá xua tơdjâk dêi pơreăng COVID-19.

Pôa Y Thanh Hà Niê Kdăm, Kăn hnê ngăn Hô̆i đong Hdroâng kuăn ngo dêi Kuô̆k hô̆i diâp 500 rơtuh liăn sap ing kơxô̆ liăn kum dêi Hngêi rak liăn BIDV ăm mâu ngế ki xơpá a Dak Nông

Xuân tung rôh lăm pôu kố, pôa Y Thanh Hà Niê Kdăm, Kăn hnê ngăn Hô̆i đong hdroâng kuăn ngo dêi Kuô̆k hô̆i diâp 150 hnoăng tơmeăm ăm rơpŏng kơtiê, rơpŏng ki ai troăng hơlâ tŏng kum, mâu ngế ki châ kuăn pơlê loi nhuô̆m cho hdroâng kuăn ngo, rơpŏng kơtiê, malối xơpá ƀă 500 rơtuh liăn sap ing kơxô̆ liăn dêi Hngêi rak liăn TMCP Đầu tư và Phát triển Việt Nam ăm mâu rơpŏng ki ai troăng hơlâ tŏng kum, mâu ngế kơtiê, kŏng nhân pêi cheăng xơpá dêi kong pơlê.

Katarina Nga tơplôu ƀă tơbleăng