VOV4.Xơ Đăng - Kơxê lơ 1/4, jâ Võ Thị Ánh Xuân, Kăn xiâm phŏ hnê ngăn tơnêi têa troh lăm pôu ƀă pêi cheăng ƀă kăn ƀô̆ mô đô̆i Đông gâk tơkăng kong Gành Dầu, cheăm Gành Dầu, pơlê kong kơdrâm Phú Quốc, kong pơlê Kiên Giang. Đông mô đô̆i gâk tơkăng kong Gành Dầu pơkuâ kơpong kĭng têa kơxĭ xŏn 33km. A kơpong têa kơxĭ pơkuâ ai 3 rơlố mê cho rơlố Hòn Bàng, Hòn Thầy Bói, Hòn Móng Tay. Tung hơnăm 2021, đông mô đô̆i gâk tơkăng kong Gành Dầu hiăng tơkâ hluâ pá puât vâ pêi kêi đeăng hnoăng cheăng péa xôh, rế hbrâ mơdât pơreăng, rế hbrâ mơdât mâu ngế xôi rế mơhnhôk kuăn pơlê tơnăng ká xi xŏng a têa kơxĭ pêi pro tro pơkâ luât, gâk kring têa kơxĭ rơlố ƀă hía hé.

Jâ Võ Thị Ánh Xuân, Kăn xiâm phŏ hnê ngăn tơnêi têa pêi cheăng a Đông mô đô̆i gâk tơkăng kong Gành Dầu

Kăn xiâm phŏ hnê ngăn tơnêi têa kheăn kơdeăn ƀă ki rơhêng vâ tối kheăn kơdeăn hiâm mơno rŭm môi tuăn, tơkâ hluâ pá puât kêi đeăng hnoăng cheăng dêi kăn ƀô̆, mô đô̆i đông gâk tơkăng kong Gành Dầu. Tơdrêng amê pơkâ thế đông lêng thế tơmâng troh tơdroăng mơjiâng Đảng vâ pêi tơtro tơdroăng kal kí, troăng tơmiât ƀă pơkuâ kăn ƀô̆; mơjiâng khu cheăng ó rơdêi tŭm têk, ki rơhêng vâ tối cho khu kăn ƀô̆ pơkuâ hnê mơhno rế ai tuăn ngôa pêi cheăng rơkê rế khên tơnôu tơdroăng kal kí ƀă djâ troăng ahdrối.

A Sa Ly tơplôu [ă tơbleăng