Teăng mâ kăn pơkuâ Tơnêi têa ƀă Hô̆i đong Tơ’noăng Khĕn kơdeăn Tơnêi têa, jâ Võ Thị Ánh Xuân, Phŏ kăn xiâm hnê ngăn tơnêi têa khĕn kơdeăn, rơkâu mâu tơdroăng ki pêi pro ki kal dêi Đảng ƀô̆, kăn pơkuâ ƀă Kuăn pơlê kong pơlê Thanh Hóa hiăng pêi châ tung hneăng hdrối nah. Tơdrêng amê hlối tối nhên, kong pơlê Thanh Hóa dế trâm mâu rôh ki tơ’lêi hlâu kân vâ chiâng kong pơlê ki djâ troăng ahdrối, kong pơlê tiô pơkâ dêi lâp tơnêi têa, tơmiât troh kong pơlê kro mơdrŏng lĕm, rơkê, hơniâp a hơnăm 2045 môi tiah tơdroăng rơhêng vâ dêi Đảng Tơnêi têa ƀă pơkâ pêi ki Hneăng hôp Đảng ƀô̆ kong pơlê Thanh Hóa rôh má XX hiăng mơ’no.

Vâ pêi châ mâu tơdroăng kố, pâ thế Đảng ƀô̆, kăn pơkuâ, lêng ƀă kuăn pơlê kong pơlê Thanh Hóa athế mơnhông khôi hmâ ki khên tơnôu ƀă mâu tơdroăng ki hiăng pêi châ; ‘mâi mơnhông mâu tơdroăng ki ối ‘ro tá tơdroăng ôh tá hâi pêi tơƀrê ƀă mâu tơdroăng ki ôh tá vâ tơmâng pêi; ing mê hlo mâu tơdroăng ki ôh tá tro tung cheăng mơjiâng Đảng, mơjiâng khu cheăng kal kí, tung hnoăng cheăng pơkuâ tơnêi têa a mâu kơvâ cheăng ki ôh tá tơniăn; tơkâ luâ mâu xơpá, pơloăng ki trâm; tơdjuôm ivá môi hiâm mơno ăm Thanh Hóa pơtối mơnhông rĕng ƀă krá ton.