Sa Ly: -Ô pôa A Don! Cho môi ngế kăn ƀô̆, đảng viên, pôa hiăng rup kŏng pêi pro Roh mơhnhôk “Pơhlêh troăng tơmiât, túa pêi” môi tiah lâi?

A Don: ‘’Sap ing ai tơdroăng pơkâ pêi hnê mơhno ing kong pơlê troh tơring ‘na ‘’pơhlêh troăng tơmiât, túa pêi’’, mê á ƀă rơpŏng hiăng tơmiât pro môi tiah lâi vâ rơpŏng pơhlêh tơdroăng tơmiât pêi tro má môi vâ vâi krâ tung pơlê pêi tiô. Ing mê, á tơpui ƀă mâu to lâi ngế nhŏng o tung rơpŏng hngêi rơtế pêi, pơhlêh troăng pêi, pêi drôm ƀă dêi pó. Klêi kơ’nâi hlo châ tơƀrê, á hiăng tơpui ƀă nhŏng o pêi pro Tôh tơrŭm cheăng, xo inâi kuăn á cho ‘’Tôh tơrŭm cheăng Y Du Đăk Rô Gia, Đăk Trăm’’ vâ kĭ  tơkêa roê tâi tơmeăm pêi lo ing chiâk deăng ăm vâi krâ kuăn pơlê. Drêng tôh tơrŭm cheăng pêt kơtếo mê kĭ tơkêa ƀă Kŏng ti tơlo liăn kơtếo xik Kon Tum; drêng pêt sik mê kĭ tơkêa ƀă Kŏng ti Đồng Giao Gia Lai; drêng pêt loăng plâi mắc ca mê kĭ tơkêa rôe tâi tâng tơmeăm ƀă Kŏng ti Dương Gia Kon Tum.

Á đi đo mơ-eăm, cho kăn ƀô̆ cheăm mơngế Rơteăng, á djâ troăng ahdrối vâ vâi krâ kuăn pơlê Rơteăng hlo châ tơƀrê vâ mơ-eăm, mơnhông tâ mê nếo. Vâ rơtế dêi pó mơnhông pêi cheăng kâ, ahdrối cho thế pơhlêh troăng tơmiât, túa pêi vâ châ tơƀrê. Sap ing mê nah troh nôkố, rơpŏng á hiăng pơhlêh hên’’.

Sa Ly: Apoăng pêi pro ki klâi xuân trâm hên tơdroăng ki pá’’, hâi khế apoăng nếo pêi pro troăng pêi Tôh tơrŭm cheăng, rơpŏng pôa hiăng trâm mâu tơdroăng pá puât ki klâi?

A Don: “Apoăng vâ mơjiâng tôh tơrŭm cheăng cho pá, xua kuăn pơlê tá hâi hlê plěng ‘na mơjiâng tôh tơrŭm cheăng vâ rôe tâi tâng tơmeăm khoăng dêi kuăn pơlê pêi lo, vâi krâ kuăn pơlê tá hâi hlê plěng trâu hơngế tơdroăng ki mê. Môi tiah á châ hriâm troh tá tui lui á hiăng mơ-eăm pêi hdrối vâ kuăn pơlê hlo ki châ tơƀrê cheăng kâ, ing mê kuăn pơlê hiăng pâ veăng tung tôh tơrŭm cheăng ƀă ngin hiăng rơtế dêi pó mơjiâng tôh tơrŭm cheăng’’.

Sa Ly: Tơkâ hluâ mâu tơdroăng pá puât apoăng mê nah, ‘’Tôh tơrŭm cheăng Y Du Đăk Rô Gia, Đăk Trăm’’  hiăng pêi cheăng ƀă châ tơƀrê apoăng môi tiah lâi, ô pôa?

A Don: ‘’Apoăng ngin mơjiâng tôh tơrŭm cheăng ai 4 ngế tê. A hơnăm 2021 ngin mơjiâng ai 4 rơpŏng ƀă chiâk deăng 2,7 hectar, troh hơnăm 2024 vâi krâ kuăn pơlê hiăng veăng tôh tơrŭm cheăng tâk troh 214 rơpŏng, ƀăng chiâk deăng hiăng tâk 43 hectar tâng pơchông ƀă loăng plâi ki ê pêt kơtếo cho châ tơƀrê, pêt môi xôh mê châ kâ 3 troh 4 rơnó. ‘Na pêt kơtếo tơdroăng cheăng kâ châ kâ péa xôh tâng pơchông ƀă pêt pôm loăng châ kâ hên tâ 3 troh 4 xôh, tối tơdjuôm pêt kơtếo cho hôm ‘nâng. Vâi krâ kuăn pơlê hlo tơdroăng ki châ tơƀrê cheăng kâ môi tiah mê xua mê vâi krâ kuăn pơlê mơ-eăm. Hơnăm kố cheăm mơ-eăm po rơdâ ƀăng chiâk deăng tơ’nôm 10 hectar vâ xăm kơklêa kơdroh kơtiê’’.

Sa Ly: Tiah mê pơkâ pêi plah apoăng hiăng châ tơƀrê, mê cho tơdroăng ‘’Pơhlêh troăng tơmiêt, túa pêi’’  ƀă hiăng châ tơƀrê apoăng?

A Don: ‘’Nôkố hiăng pơhlêh, má môi cho pơhlêh ‘na troăng tơmiât, má péa cho pơhlêh troăng pêi. Hdrối nah ‘na tơdroăng tơmiât bu pêi xêh môi ngế tê, ôh tá ai tơdroăng ki tơrŭm môi tuăn tơkŭm dêi pó rơtế pêi vâ pêi lo tơmeăm. Má péa nếo, cho tơdroăng pơhlêh nôkố hiăng pêt ƀă loăng plâi ki pêt mê hiăng pêi lo liăn, ai liăn ngân rôe phái, rôe báu, mơjiâng pro hngêi, rôe rơxế honđa vâ kơto prôk lăm, nôkố tơdroăng rêh ối dêi vâi kuăn pơlê hiăng hôm tâ hdrối nah’’.

A Sa Ly: Ê, pâ rơkâu pôa rơtế vâi krâ kuăn pơlê tơrŭm tung Tôh tơrŭm cheăng Y Du Đăk Rô Gia, Đăk Trăm hiăng cheăng kâ pơxiâm châ tơƀrê.