A rôh lăm pôu, Kăn hnê ngăn Tỉnh ủi Lâm Đồng tối ‘na tơdroăng hiăng klêi hôp dêi hneăng hôp kân mâu kăn tung lâp tơnêi têa 14 dêi Đảng, mâu tơdroăng ki kal, troăng hơlâ rĕng djâ pơkâ hneăng hôp 14 xúa tung rêh ối. Pôa Y Thanh Hà Niê Kdăm khĕn kơdeăn mâu tơdroăng ki mơ-eăm dêi Đảng ƀô̆, mâu kăn ƀă kuăn pơlê Đặc khu Phú Quý tung mơnhông cheăng kâ - pơlê pơla rơtế ƀă  rak vế tơnêi, kring tơniăn chuăn rơlố; hlối pơtroh rơkong rơkâu hơnăm nếo troh tâi tâng mâu kăn ƀô̆, đảng viên, mâu lêng ƀă kuăn pơlê a chuăn.

Rôh kố, mâu kăn hiăng pơcháu 67 kơxu tơmeăm Têt ăm Đảng ủi, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n tơnêi têa Việt Nam Đặc khu Phú Quý, tơdrêng ƀă mâu khu lêng dế pêi hnoăng cheăng tung kong pơlê. Pơtối mê, khu kăn troh lăm pôu, rơkâu Têt a Đông tơkăng kong Tíu tê mơdró tơkăng kong kơno têa Phú Qúy; diâp tơmeăm, mơhnhôk kăn ƀô̆, mâu lêng,  rơkâu  tíu pêi cheăng pêi klêi hnoăng cheăng kring vế hnoăng pơkuâ, kring tơniăn kơpong têa kơxĭ, tung rôh Têt Lo hơnăm nếo Bính Ngọ 2026.