A cheăm Hòa Phú, Tíu xiâm pro mơ-éa cheăng kâ rêh ối ƀă tơnêi têa pro hô sơ tro hâi khế pơkâ châ lối 99%, bu u ối 28 hô sơ hrá ối tung kơvâ tơnêi tơníu. Troăng pêi ‘’Khu ki pro rĕng’’ ƀă ‘’Thôn xúa kŏng ngê̆ - Tơ’lêi hlâu, tơdrăng’’ châ pêi pro kum kuăn pơlê kơpong hơngế châ achê tơ’lêi hlâu tâ ƀă tơdroăng pro mơ-éa rêh ối cheăng kâ ƀă tơnêi têa.

A bêng Ea Kao, Tíu xiâm xing xoăng 10 kăn ƀô̆, hbrâ tŭm hngêi trăng troăng klông kŏng ngê̆, hiăng pro lối 2.500 hô sơ, pro tro hâi khế châ 99,7%. Bêng dế mơnúa xúa phân mêm ki rơkê tŏng gum kuăn pơlê nâp hô sơ ƀă séa ngăn tơdroăng ƀă mah QR, tơdrêng amê tơdjêp mâu tơdroăng pro mơ-éa cheăng kâ – rêh ối ƀă tơnêi têa tung phân mêm ‘’Dak Lak xúa kŏng ngê̆ kơxô̆’’.

Ing séa ngăn, pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak pơkâ thế 2 kong pơlê pơtối éa ngăn, hbrâ tro pơkâ, mơ’no tơdâng tơ’mô kŏng ngê̆, hnê mơjiâng kăn ƀô̆ pêi cheăng vâ mâu tíu xiâm pêi cheăng châ tơƀrê, păng ‘nâng tâ mê, kum mơjiâng khu râ kăn pêi cheăng xúa kŏng ngê̆ a cheăm bêng.