Rôh livestream châ tơkŭm po ƀă tơdroăng rơtế veăng dêi Khu pêi cheăng tơrŭm Nông nghiệp sạch Krông Pač, kuăn pơlê, đoân viên droh rơtăm cheăm rơtế ƀă mâu khu mơdró kâ gum pro logistics ƀă chơ tơmeăm. Tơdroăng kố châ mơ’no tung mâu trang măng kơxô̆. Tơpui tung rôh livestream, jâ Ngô Thị Minh Trinh, Kăn pơkuâ ngăn Đảng cheăm Ea Knuêč tối nhên:

“Ki xiâm dêi rôh livestream kố ôh ti xê pơtê to a tơdroăng ki tê châ to lâi tâ̆n sầu riêng, mê ki kal tâ cho mơđah tơbleăng um, plâi dêi pơlê cheăm; mơhnhôk vâi krâ kuăn pơlê rơtế veăng tung rôh pơhlêh kơxô̆, sap ing tơdroăng ki hriâm túa tê tơmeăm ing măng pơlê pơla troh mơđah túa lĕm tro dêi cheăm; tơdrêng amê hlối tối rơdêi ki lĕm dêi tơmeăm pêi lo ing chiâk deăng Dak Lak tung kơchơ mơdró”.

Pakĭng tơdroăng ki ai mâ dêi kăn pơkuâ ngăn Đảng cheăm, ai mâu kuăn pơlê mâu cheăm ki ‘nâ xuân veăng rơtế tơbleăng mâu kế tơmeăm. Ki nhên cho jâ Hoàng Thị Nguyên, 70 hơnăm, rêh ối a thôn Tân Sơn, cheăm Ea Knuêč phiu ro tối drêng rôh apoăng châ râng mi-crô tơbleăng tơmeăm pêi lo dêi pơlê tung hyôh um:

“Châ peăng pa Đảng ủi cheăm, kăn pơkuâ đảng ƀă mâu khu râ kơvâ cheăng dêi cheăm ngin ai tơdroăng tơbleăng pêi, maluâ hiăng 70 hơnăm la xuân ối kơhnâ hâk vâ veăng vâ ăm mâu vâi muăn kuăn cháo ai tơdroăng ro hơniâp dêi rơpŏng athế mơ-eăm pêii tiah lâi châ hên sầu riêng vâ tê ngi kong têa ê ƀă pin hâk tơngăm ‘na mâu kuăn cháu rơpŏng hngêi pin cho hơniâp ro má môi”.

Ƀă kuăn pơlê, tơdroăng ki kăn pơkuâ cheăm ôh ti xê to veăng pêi pro ƀă tơdroăng pơkâ lơ mơ-éa, mê ƀă tơdroăng pêi pro nhên, hiăng ăm kăn ƀô̆ achê ƀă kuăn pơlê tâ. Tơdroăng kăn pơkuâ cheăm rơtế ƀă vâi krâ kuăn pơlê “châ mơ’no tung hyôh” cho túa pêi ai pơxúa vâ tơdjâk hiâm mơno pơhlêh nếo tơmiât pêi rơkê, tơdrêng amê hlối ‘mâi mơnhông tơdroăng loi pơla kuăn pơlê ƀă kăn pơkuâ. Pôa Mai Đình Thọ, Kăn hnê Khu pêi cheăng tơrŭm Nông sạch Krông Pač, mơnhên tối khât tơmiât pêi kố:

“Á hâk tơngăm khât ƀă môi ngế kăn kơdrâi pơkuâ cheăng Đảng cheăm ôh ti xê tơkŭm tung hnoăng cheăng pơkuâ a cheăm mê ối tơmâng ngăn troh tơdroăng tŏng gum vâi krâ kuăn pơlê ing túa tơmiât tê tơmeăm online. Túa pêi kố gum kuăn pơlê châ xúa túa tê tơmeăm ki nếo, mơdêk ki kơnía dêi tơmeăm ƀă pro pơxúa tơƀrê na liăn ngân ai pơxúa tâ. Á tơmiât tiah kố môi ngế kơdrâi pro kăn pơkuâ ngăn Đảng tiah mê rế rơkê plĕng, rế achê ƀă kuăn pơlê, gá cho rơtế ƀă kuăn pơlê vâ tăng hlo troăng hơlâ pêi pro tro má môi ăm vâi krâ kuăn pơlê, tơmâng ngăn troh mâu tơdroăng pêi pro nhên tung tơdroăng rêh ối dêi kuăn pơlê”.

Rôh livestream tơ’mot lối rơpâu ngế ngăn ƀă hên đơn kok roê tơmeăm. Ôh ti xê tŏng gum tê tơmeăm pêi lo ing chiâk deăng, tơdroăng kố ối gum vâi krâ kuăn pơlê châ hlo ƀă mâ hriâm ƀối túa mơđah tơbleăng tơmeăm ƀă kế tơmeăm kơxô̆, mơjiâng tơdroăng hmâ pêt-tê mơdró tro ƀă kơchơ mơdró rơkê plĕng.

Tơdroăng kăn pơkuâ ngăn Đảng cheăm Ea Knuêč, kong pơlê Dak Lak livestream tê sầu riêng hâi ki mê nah châ mơnhên tối cho hvêa chêng prôk ki nhên pêi pro pơhlêh tơdroăng Pơkâ 57-NQ/TW vâ mơdêk rơdêi xúa khoa hok kong ngê̆ ƀă pơhlêh kơxô̆, tơdrêng amê hlối mơhno tơdroăng tơhrâ “achê kuăn pơlê, hmâ ƀă kuăn pơlê” ƀă tơdroăng pêi pro ai pơxúa dêi kăn pơkuâ cheăm drêng pêi pro kăn pơkuâ 2 râ.