VOV4.Xơ Đăng - Drêng Têt Lo hơnăm nếo Nhâm Dần 2022, kơxo lơ 26/1, Khu kăn ki pêi dêi hnoăng cheăng dêi Khu pơkuâ ngăn Đảng ủy, Hô̆i đong hnê ngăn, Vi ƀan hnê ngăn, Vi ƀan xiâm Măt trâ̆n Tơnêi têa Việt Nam kong pơlê Dak Lak xua pôa Nguyễn Đình Trung, Kăn pơkuâ ngăn Đảng pro kăn pơkuâ khu kăn kố hiăng troh pôu, rơkâu Têt ƀă hbru tơmeăm ăm mâu tíu pêi cheăng Khu xiâm pơkuâ ngăn lêng kong pơlê, Viê̆n Vệ sinh dịch tễ Tây Nguyên ƀă Hngêi pơkeăng ki pro pơtân kơxô̆ 1.

Pôa Nguyễn Đình Trung ƀă Khu kăn ki pêi dêi hnoăng cheăng hbru tơmeăm ăm mâu ƀok thái pơkeăng a hngêi pơkeăng ki pro pơtân kơxô̆ 1

A mâu tíu troh, Khu kăn ki pêi dêi hnoăng cheăng kố hiăng tơmâng kăn pơkuâ mâu tíu pêi cheăng tối tơbleăng klêi kơ’nâi pêi pro mâu tơdroăng cheăng dêi tơrêm tíu pêi cheăng tung hơnăm 2021 xuân môi tiah troăng hơlâ pơkâ, hnoăng cheăng pêi tung hơnăm 2022, malối cho túa pơkâ rak tơniăn gâk kring, hnoăng cheăng pơlât mâu ngế ki tâ COVID-19 ƀă rak ngăn ivá ăm kuăn pơlê hơniâp ro rơnó hơngui tơdah têt 2022.

Pôa Nguyễn Đình Trung, kăn pơkuâ ngăn Đảng pơtroh rơkong rơkâu hơnăm nếo 2022 tơniăn lĕm, ivá rơdêi, hơniâp ro troh kăn ƀô̆, mâu lêng, mâu ƀok thái pơkeăng, mâu ngế cheăng ‘na khăm pơlât dêi mâu tíu pêi cheăng; rơhêng vâ, tung la ngiâ, kăn ƀô̆, lêng, mâu ƀok thái pơkeăng dêi mâu tíu pêi cheăng pơtối mơdêk mâu tơdroăng ki hiăng pêi pro klêi, ƀă pêi klêi hnoăng cheăng ki châ pơcháu.

Gương tơplôu ƀă tơbleăng