VOV4.Xơ Đăng - Phiu ro koh leh tơbâ 91 hơnă Hâi mơjiâng Đoân droh rơtăm Kŏng san Hồ Chí Minh, kơxê lơ 25/3, tơkŭm po roh tơpui tơno mơ’no tơdrêng tung um tiô troăng măng Internet pơla ngoh Nguyễn Anh Tuấn, Kăn pơkuâ hnê mơhno má môi Khu xiâm pơkuâ Đoân droh rơtăm Kŏng san Hồ Chí Minh, Kăn hnê ngăn Khu pơkuâ droh rơtăm Việt Nam ƀă đoân viên, droh rơtăm vâi hdrêng tung tơnêi têa ƀă kong têa ê ƀă dó inâi ‘’Pói vâ pleăng hnoăng cheăng – Tơdroăng rêh ối tơtro droh rơtăm’’.

A roh tơpui tơno, ngoh Nguyễn Anh Tuấn kô tơmâng tơdroăng tơpui tối, pói vâ  dêi đoân viên droh rơtăm, tiâ tơdroăng rơhêng vâ ‘nâi plĕng; tơmâng xo mâu tơdroăng pơkâ, pâ thế, tăng troăng pêi ki rơkê dêi rơxông ối nếo tung tơnêi têa ƀă kong têa ê; tơpui tơno ‘na hnoăng cheăng dêi khu pơkuâ Đoân ƀă đoân viên, droh rơtăm; troăng troăng pêi rơkê vâ khu pơkuâ Đoân droh rơtăm tung tơdroăng veăng pro tơniăn, mơnhông mơdêk cheăng kâ tơnêi têa klêi kơ’nâi tơdjâk dêi pơreăng COVID-19; tơdrêng amê, pơkâ xiâm kối, troăng pêi ăm tơdroăng pêi cheăng Đoân ƀă tơdroăng pêi droh rơtăm phô̆m xông kân tung la ngiâ.

A Sa Ly tơplôu ƀă tơbleăng