VOV4.Xơ Đăng - Tung péa hâi lơ 19 ƀă 20/1, Khu kăn ki pêi dêi hnoăng cheăng dêi Khu pơkuâ ngăn Đảng, Hô̆i đong hnê ngăn, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê Kon Tum hiăng troh pôu, rơkâu Têt khu lêng gak tơkăng kong, khu kăn pơkuâ ƀă kuăn pơlê a kơpong tíu tơkăng kong tơdjêp ƀă kong têa Lếo. Troh pôu, rơkâu Têt kăn ƀô̆, lêng mâu Đông mố đô̆i gak tơkăng kong, khu kăn pơkuâ ƀă kuăn pơlê 3 to cheăm tơkăng kong ki tơdjêp ƀă kong têa Lếo, cho: Đăk Plô, Đăk Nhoong, tơring Đăk Glei; Đăk Dục, tơring Ngọc Hồi.

Pôa Dương Văn Trang, kăn pơkuâ ngăn Đảng, rơkâu Têt, hbru tơmeăm ăm kăn ƀô̆ lêng mố đô̆i gâk tơkăng kong

Pôa Dương Văn Trang, kăn pơkuâ ngăn Đảng, kăn hnê ngăn Hô̆i đong kong pơlê Kon Tum rơtế ƀă mâu ngế cheăng tung khu hiăng pôu kơ-êng ‘na hnoăng cheăng hbrâ tơdah Têt, hbru tơmeăm ăm kăn ƀô̆, lêng mố đô̆i gak tơkăng kong, khu kăn pơkuâ ƀă kuăn pơlê. Khu kố hiăng troh pôu, rơkâu Têt, hbru tơmeăm ăm mâu rơpŏng ki ai hnoăng ƀă kăch măng a cheăm Đăk Plô, Đăk Nhoong, tơring Đăk Glei ƀă cheăm Đăk Dục, tơring Ngọc Hồi.

Pôa Dương Văn Trang, Kăn pơkuâ ngăn Đảng kong pơlê Kon Tum (ngế ki truâ muâk) pôu, rơkâu Têt, hbru tơmeăm ăm rơpŏng kơtiê a pơlê Bung Tôn, cheăm Đăk Plô, tơring Đăk Glei

Drêng kố ai mâu khu mơdró kâ lăm rơtế ƀă khu kăn rơkâu Têt xuân hiăng diâp 600 hnoăng tơmeăm, rêm hnoăng 500 rơpâu liăn ăm kuăn pơlê a 3 to cheăm tơkăng kong.

Katarina Nga tơplôu ƀă tơbleăng