Tơpui hnê mơhno a Hneăng hôp, pôa Trần Cẩm Tú tối nhên, bêng Bàn Thạch kal mơjiâng kăn pơkuâ rơkê plĕng, tơdrăng, gum Kuăn pơlê; mơdêk ki rơkê plĕng dêi mâu kăn ƀô̆, pêi pro pơhlêh kơxô̆ tung pơkuâ ngăn, pơhlêh chêh pro mơ-éa tơƀrê, achê ƀă kuăn pơlê. Tơdrêng amê hlối pơkâ thế Khu pơkuâ ngăn Đảng Pơlê kong kân Đà Nẵng ƀă mâu khu râ, pơkuâ cheăng pơtối tơmâng ngăn, tŏng gum xơpá ăm Bàn Thạch tung hneăng apoăng pêi túa pơkâ kăn pơkuâ péa râ.

Hneăng hôp tơbleăng pơkâ dêi Khu pơkuâ ngăn Đảng pơlê kong kân Đà Nẵng hnê mơhno Khu pơkuâ Đảng ƀô̆, Khu pơkuâ ngăn Đảng ủy, kăn pơkuâ hnê ngăn Đảng, phŏ kăn pơkuâ Đảng bêng Bàn Thạch, pơla hơnăm 2025 – 2030. Khu pơkuâ ngăn Đảng ƀô̆ bêng ai 28 ngế; Khu pơkuâ ngăn Đảng ủy bêng ai 10 ngế. Pôa Nguyễn Duy Ân, kăn hnê UBND pơlê kong kơdrâm Tam Kỳ hdrối nah châ pơkâ thế pro kăn pơkuâ ngăn Đảng ủy bêng; 2 ngế phŏ pơkuâ ngăn Đảng ủy bêng cho pôa Lê Ngọc Dương prế pôa Dương Văn Tuấn.