VOV4.Xơ Đăng - Pôa Nguyễn Quốc Dũng, Kăn teăng mâ Việt Nam a kong têa Mih hiăng ai roh tơpui tơno ƀă jâ Sarah Bianchi, Kăn phŏ teăng mâ tê mơdró kong têa Mih. Péa pâ môi tuăn ‘na tơdroăng ki kal dêi tơdroăng thăm pêi pro mâu tơdroăng tơrŭm cheăng kâ – tê mơdró pơla kong têa Mih ƀă kơpong ƀă Việt Nam. A roh trâm mâ, pôa Nguyễn Quốc Dũng ƀă jâ Sarah Bianchi kheăn kơdeăn tơdroăng mơnhông mơdêk cheăng kâ – tê mơdró pơla péa tơnêi têa tung pơla kố nah.

Péa pâ tơpui tơno ‘na mâu kơvâ tơrŭm cheăng ƀă tơmâng tơdjuôm tung tơrŭm tê mơdró Việt Nam – Mih ƀă môi tuăn ‘na tơdroăng ki kal dêi tơdroăng thăm tơrŭm ‘na cheăng kâ – tê mơdró pơla Mih ƀă kơpong ƀă Việt Nam.

Pôa Nguyễn Quốc Dũng pói vâ péa pâ pơtối rak tơrŭm cheăng, tơpui tơno vâ môi tuăn tung mâu tơdroăng ối phá tơ-ê. Kăn phŏ teăng mâ tê mơdró kong têa Mih phiu ro pôa Nguyễn Quốc Dũng troh a pơlê kong xiâm Washington, pói vâ pơtối pêi cheăng krá tơniăn ƀă Kăn teăng ƀă Kơ koan teăng mâ Việt Nam vâ thăm tơrŭm cheăng kâ ƀă tê mơdró pơla péa pâ.

A Sa Ly tơplôu ƀă tơbleăng