VOV4.Xơ Đăng - Kơxê lơ 4/4, Khu ki pêi dêi hnoăng cheăng dêi Tơnêi têa xua pôa Y Thanh Hà Niê Kdăm, Kăn hnê ngăn Hô̆i đong Hdroâng kuăn ngo Kuô̆k hô̆i hiăng troh pôu ƀă rơkâu Têt khôi hmâ Chôl Chnăm Thmây dêi hdroâng kuăn ngo Khmer a chuô Som Rong, bêng 5, pơlê kong kơdrâm Sóc Trăng. Pôa Y Thanh Hà Niê Kdăm, Kăn hnê ngăn Hô̆i đong hdroâng kuăn ngo Kuô̆k hô̆i tối, tơdroăng ki phiu ro drêng troh pôu mâu ƀok phop, mâu ngế ki pơkuâ a hngêi chuô Som Rong.

Khu kăn ki pêi dêi hnoăng cheăng dêi Hô̆i đong Hdroâng kuăn ngo pôu, rơkâu Têt khôi hmâ dêi hdroâng kuăn ngo Khmer

Drêng Têt Chôl Chnăm Thmây hiăng vâ chê troh, Kăn hnê ngăn Hô̆i đong hdroâng kuăn ngo Kuô̆k hô̆i pơtroh rơkong rơkâu troh mâu ƀok phop, mâu ngế ki cheăng tung hngêi chuô Som Rong hơnăm nếo ai hên ivá ƀă tơniăn lĕm. Tơdrêng amê hlối rơhêng vâ, tung la ngiâ ah, khu rak ngăn xuân môi tiah ngế ki pơkuâ chuô kô pơtối mơhnhôk vâi krâ nhŏng o khôp Phop pêi pro tro troăng hơlâ pơkâ dêi Đảng, luât dêi Tơnêi têa, mơjiâng  pơlê cheăm Sóc Trăng rế hía rế kro mơdrŏng, veăng kum mơjiâng khô̆i tơrŭm tâi tâng hdroâng kuăn ngo dêi tơnêi têa.

Katarina Nga tơplôu ƀă tơbleăng