Klêi kơ’nâi 6 hâi tơdế pêi cheăng, Hneăng hôp ôh tá tối hdrối roh má 9, Kuô̆k hô̆i hneăng má 15 hiăng kêi đeăng tơdroăng xiâm hiăng pơkâ mơ’no. Xông tơpui mơgêi Hneăng hôp, pôa Trần Thanh Mẫn, Kăn xiâm hnê ngăn Kuô̆k hô̆i mơnhên: mâu troăng hơlâ hiăng châ Kuô̆k hô̆i tơbleăng ăm pêi pro cho teăm tơdrêng, cho thế ti mê ôh tá tơdjâk pakong, tro khât, tơmiêt hơhngế, pro ăm hlo ‘ló tro kuăn pơlê tiô ƀối dêi Đảng, Tơnêi têa.

Hneăng hôp kố, Kuô̆k hô̆i hiăng séa ngăn, tơbleăng ăm pêi pro 4 luât, tơbleăng ăm pêi pro Pơkâ ‘na tơleăng mâu tơdroăng tơdjâk troh rah xo bro lế lĕm khu pêi cheăng tơnêi têa ƀă 4 pơkâ vâ pêi pro tơdroăng rah xo bro lế lĕm tro khu pêi cheăng dêi Kuô̆k hô̆i, Chin phuh; tơbleăng ăm pêi pro 6 Pơkâ vâ mơdêk cheăng kâ – rêh ối pơlê pơla dêi tơnêi têa ƀă mâu troăng pơkâ pêi, troăng hơlâ ki phá tơ-ê ƀă mâu tơdroăng tơkêa bro, tơmeăm ki xiâm tơnêi têa.

Pôa Trần Thanh Mẫn, Kăn xiâm hnê ngăn Kuô̆k hô̆i tối rơdêi, kố cho tíu ki hdró kal tung tơdroăng mơjiâng luât, ai kơnâ kal khât, tung tơdroăng pơhlêh rah xo bro lế lĕm tro khu pêi cheăng dêi khu cheăng kal kí ƀă teăm tơdrêng tah lôi pá puât, tơvâ tơvân ‘na pơkâ, troăng hơlâ, mơjiâng ki châ tơƀrê vâ kêi đeăng hngêi trăng troăng klông, mơnhông mơngế pêi cheăng, mơjiâng tíu mơnhông hơngế ăm kong pơlê ƀă lâp tơnêi têa.