Xông tơpui a Leh tơbleăng, diâp pơkâ kheăn kơdeăn ƀă mơhnhôk pêi pro tơdroăng tơ’noăng hơnăm  2025 a kơmăng lơ 13/2, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế kal pơtối pơhlêh nếo ó rơdêi troăng tơmiât, troăng pêi, mơdêk hlê plĕng, pơhlêh nếo tơkŭm po tơdroăng Kuô̆k hô̆i tâ mê nếo, tơxâng tơdroăng pói vâ, pói châ dêi Đảng, kuăn pơlê.

Teăng mâ khu râ kăn pơkuâ hnê ngăn Đảng, Tơnêi têa, pôa Trần Thanh Mẫn, Kăn xiâm hnê ngăn Kuô̆k hô̆i diâp Me dái pêi cheăng ối Má Môi ăm jâ Lê Thị Nguyệt, Phŏ Kăn xiâm pơkuâ Vi ƀan mâu pơlê pơla dêi Kuô̆k hô̆i, Phŏ Kăn pơkuâ pơtâng tối kuăn pơlê ối tung Vi ƀan pơkuâ Kuô̆k hô̆i; diâp Ƀâng kheăn kơdeăn dêi Vi ƀan pơkuâ diâp 15 khu pú hên.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, kố cho hơnăm apoăng, Vi ƀan pơkuâ Kuô̆k hô̆i pêi pro tơdroăng tơ’noăng, kheăn kơdeăn đi đo a mâu kơ koan dêi Kuô̆k hô̆i tiô Luât Tơ’noăng, kheăn kơdeăn. Khu xiâm kal kí hiăng tơbleăng Pơkâ kơxô̆ 41 ‘na thăm pơkuâ dêi Đảng ƀă tơdroăng tơ’noăng, kheăn kơdeăn tung rơxông nếo.

Kăn xiâm hnê ngăn Kuô̆k hô̆i pơkâ kal hlê plĕng pêi pro pơkâ vâ mơhnhôk roh tơ’noăng păng ‘nâng leh tơbâ 100 hơnăm mơjiâng Đảng ƀă 100 hơnăm mơjiâng Tơnêi têa.