VOV4.Xơ Đăng - Kơxê lơ 20/3, a Pơlê kong kân Hồ Chí Minh, pôa Vương Đình Huệ, Kăn xiâm hnê ngăn Kuô̆k hô̆i hiăng pêi cheăng ƀă Khu pơkuâ hnê ngăn Đảng pơlê kong kân Hồ Chí Minh ‘na tơdroăng pơkuâ, hnê mơhno ƀă tơdroăng châ tơƀrê Pơkâ mơnhông mơdêk cheăng kâ – rêh ối pơlê pơla dêi Pơlê kong kân Hồ Chí Minh hơnăm 2021, hnoăng cheăng xiâm hơnăm 2022; Châ tơƀrê pêi pro Pơkâ kơxô̆ 54 dêi Kuô̆k hô̆i ‘na mơnúa pêi pro pơkâ pêi, troăng hơlâ ki phá tơ-ê mơnhông mơdêk Pơlê kong kân Hồ Chí Minh.

Kăn xiâm hnê ngăn Kuô̆k hô̆i pêi cheăng ƀă pơlê kong kân Hồ Chí Minh

‘Na troăng pêi la ngiâ, hnoăng cheăng tung la ngiâ, pôa Vương Đình Huệ pơchân tối, Pơlê kong kân Hồ Chí Minh kal thăm mơjiâng, rah khu râ kăn pêi cheăng tung Đảng tơtro ƀă tơdroăng cheăng kal kí krúa lĕm, ó rơdêi; mơjiâng tung khu rŭm môi tuăn, môi tuăn tâi tâng tơdroăng, tơdjuôm ivá, môi hiâm mơno. Tơkŭm tơdroăng mơjiâng pơkâ pêi, pêi tiô Pơkâ Hneăng hôp XIII dêi Đảng ƀă Pơkâ Hneăng hôp Đảng ƀô̆ pơlê kong kân roh má XI, séa ngăn mâu tơdroăng pêi cheăng, rĕng ai troăng mơnhông cheăng kâ - rêh ối pơlê pơla, mâu pơkâ, hnoăng cheăng vâ ‘mâi rơnêu ăm tơtro, tơ’nôm tơtro, chiâng pêi pro.

A Sa Ly tơplôu ƀă tơbleăng